Як працуе найбуйнейшы банк Украіны падчас вайны

• 20.04.2026, 12:23

«ПрыватБанк» абслугоўвае каля 70% насельніцтва краіны.

Кіраўца найбуйнейшага банка Украіны Мікаэль Б'ёркнэрт кіруе «ПрыватБанкам» ва ўмовах паўнамаштабнай вайны, сумяшчаючы банкаўскую стратэгію з задачамі выжывання краіны, піша The Times (пераклад — сайт Charter97.org).

Банк абслугоўвае каля 70% насельніцтва Украіны — больш за 18 млн прыватных кліентаў і 1 млн кампаній — і апрацоўвае палову ўсіх плацяжоў. Паводле слоў Б'ёркнэрта, яго місія выходзіць далёка за межы фінансаў.

Вайна наўпрост уплывае на працу банка. Больш за тысячу супрацоўнікаў служаць у войску, сотні ўжо вярнуліся з фронту, уключаючы топ-менеджараў з цяжкімі раненнямі. Для ветэранаў створаны асобны кол-цэнтр і мабільныя каманды, якія працуюць у шпіталях. Прычынай для рэформаў стала рэзанансная гісторыя, калі банк адмовіў у абслугоўванні цяжка параненаму вайскоўцу — пасля гэтага працэдуры тэрмінова змянілі.

Сам Б'ёркнэрт жыве паміж Кіевам і Стакгольмам, рэгулярна праводзячы ночы ў сховішчах. З цягам часу, прызнаецца ён, трывога стала часткай паўсядзённасці, рашэнні аб тым, ці спускацца ў сховішча, прымаюцца зыходзячы з тыпу пагрозы.

Нягледзячы на рызыкі, банк працягвае працу нават пры адключэннях электрычнасці — з дапамогай генератараў, спадарожнікавай сувязі і ўзмоцненай кібербяспекі. З пачатку вайны адбіта больш за 1,5 млн кібератак.

Стратэгічна банк рыхтуецца да пасляваеннага аднаўлення Украіны, якое ацэньваецца ў $800 млрд. Кіраўніцтва разлічвае адыграць ключавую ролю ў прыцягненні міжнародных інвестыцый і фінансаванні эканомікі.

Б'ёркнэрт падкрэслівае, што галоўная задача — вярнуць давер да інстытуцый: «Калі закрываеш аддзяленні — паказваеш слабасць. Мы мусім даказваць, што сістэма працуе».

Нават ва ўмовах вайны, кажа ён, важна думаць на гады наперад: «Банкаўская справа — гэта заўсёды гульня ў доўгую».