Выведка Швецыі раскрыла, што Крэмль хавае пра эканоміку РФ

• 20.04.2026, 17:04

Расія ў тым ліку заніжае інфляцыю.

Шведская ваенная выведка заяўляе, што Расія сістэматычна маніпулюе эканамічнай статыстыкай, каб пераканаць Захад, нібыта яе эканоміка вытрымлівае вайну з Украінай і санкцыі. Пра гэта Financial Times заявіў кіраўнік Службы ваеннай выведкі і бяспекі Швецыі Томас Нільсан.

Паводле ягонай ацэнкі, рэальная інфляцыя ў Расіі бліжэйшая да 15%, чым да афіцыйных 5,86%, якія паказвае расійскі Цэнтрабанк.

Фактычна Масква заніжае і хавае маштаб эканамічных праблем.

Нільсан таксама падтрымаў ацэнку нямецкай выведкі BND, паводле якой Расія можа заніжаць памер бюджэтнага дэфіцыту прыкладна на $30 млрд. Паводле яго слоў, шведская выведка бачыць і іншыя трывожныя сігналы, уключаючы фінансавыя індыкатары, якія могуць указваць на будучы банкаўскі крызіс.

Кіраўнік шведскай выведкі лічыць, што нават рост нафтавых даходаў не вырашае сістэмных праблем расійскай эканомікі. Паводле яго слоў, мадэль, у якой рост трымаецца на вытворчасці ўзбраенняў для вайны, не можа быць устойлівай.

Нільсан заявіў, што Расія фактычна «жыве ў доўг» і ў перспектыве рухаецца або да зацяжнога спаду, або да рэзкага фінансавага шоку.

Нільсан асобна адзначыў, што Пуцін, магчыма, сам не ведае, наколькі дрэнная рэальная сітуацыя, паколькі атрымлівае скажоную інфармацыю ад сваіх чыноўнікаў. Але, паводле слоў кіраўніка выведкі, «бясконца ўцякаць ад рэальнасці» не атрымаецца.

Пры гэтым FT удакладняе, што такую жорсткую ацэнку падзяляюць не ўсе: частка міжнародных прагнозаў па-ранейшаму бліжэй да афіцыйнай лініі расійскага Цэнтрабанка.