Расійскія турысты за мяжой засталіся без доступу да «Госуслуг» і банкаўскіх сэрвісаў
- 20.04.2026, 20:06
З-за барацьбы Крэмля з VPN.
У папулярных у расіян краінах для адпачынку перасталі адкрывацца «Госуслуги» і іншыя айчынныя сэрвісы на фоне барацьбы ўладаў з выкарыстаннем VPN. Пра гэта «Коммерсанту» паведамілі ў Асацыяцыі тураператараў Расіі. «На масавых напрамках — гэта Турцыя, Тайланд, Егіпет, В'етнам, — пры падключэнні да Wi‑Fi губляецца доступ», — распавёў віцэ-прэзідэнт АТОР Артур Мурадзян.
Праз мясцовую мабільную сетку зайсці на рэсурсы расійскіх дзяржаўных органаў, банкаў і буйных кампаній таксама нельга. Так, пры спробе адкрыць прыкладанне аднаго з агрэгатараў для куплі квіткоў з'яўляецца апавяшчэнне: «Здаецца, у вас уключаны VPN», пасля чаго злучэнне знікае.
Для вырашэння праблемы расійскім турыстам прапануюць карыстацца роўмінгам. Аднак гэта прывядзе да дадатковых выдаткаў і павялічыць кошт адпачынку, папярэдзілі ў АТОР. «Па факце цяпер за мяжой, акрамя звычайнай мабільнай сувязі, нічога не застаецца», — канстатаваў Мурадзян. Ён таксама паскардзіўся, што «ў барацьбе з выкарыстаннем VPN» расійскія ўлады заблакавалі «доступ да большасці інфармацыйных рэсурсаў, звязаных з рэалізацыяй турыстычных прадуктаў».
Расіянка, якая жыве ў Турцыі, распавяла выданню, што з нядаўняга часу ў яе не адкрываюцца сайты і прыкладанні айчынных банкаў і маркетплэйсаў. Паводле яе слоў, каб атрымаць доступ, ёй таксама даводзіцца карыстацца VPN, якія дазваляюць змяняць IP-адрас на расійскі. Пры гэтым у краінах СНД такіх праблем няма.
З 15 красавіка буйныя расійскія кампаніі па прадпісанні Міністэрства лічбавага развіцця РФ перасталі пускаць на свае рэсурсы тых, хто спрабуе зайсці з уключаным VPN. Нявыкананне гэтага патрабавання пагражае пазбаўленнем дзяржаўнай акрэдытацыі, то бок стратай права на страхавыя льготы і адтэрміноўку супрацоўнікаў ад мабілізацыі. Таксама ўлады будуць выкрэсліваць рэсурсы парушальнікаў з «белага спісу» дазволеных, доступ да якіх захоўваецца пры прымусовых адключэннях інтэрнэту ў Расіі.
Пры гэтым адрозніць звычайны замежны трафік ад злучэння праз VPN тэхнічна немагчыма, адзначае кіраўнік інфармацыйна-аналітычнага агенцтва «Рустелеком» Юрый Брюквін. «Таму і маркетплэйсы, і аператары, і іншыя ўдзельнікі, якія падпадаюць пад гэтае патрабаванне, проста блакуюць практычна ўвесь замежны трафік», — дадае ён.