Цела нованароджанага немаўляці ў пакеце выяўлена ў Баранавічах

• 22.04.2026, 17:55

Падазраецца 18-гадовая дзяўчына.

Следчыя ўсталёўваюць абставіны смерці нованароджанага дзіцяці, якога выявілі па месцы жыхарства 18-гадовай пацыенткі баранавіцкай бальніцы. Пра гэта паведаміла прэс-служба Следчага камітэта.

18-гадовая дзяўчына з прыкметамі адбылых родаў 20 красавіка паступіла ў адну з медыцынскіх устаноў у Баранавічах. Супрацоўнікі міліцыі выехалі да месца яе жыхарства і там у пакеце выявілі мёртвае нованароджанае дзіця з цялеснымі пашкоджаннямі.

«На месцы здарэння працавала следча-аператыўная група. Праведзены дэталёвы агляд, зафіксавана слядовая карціна, а таксама дапытаныя сведкі і прызначаны шэраг экспертыз, у тым ліку для ўстанаўлення дакладнай прычыны смерці», — заявілі ў СК.

На дадзены момант следчыя ўсталёўваюць усе абставіны таго, што адбылося, аднаўляюць храналогію падзей, высвятляюць умовы, у якіх знаходзілася дзяўчына, а таксама прычыны, што спрыялі трагедыі.