Tesla пачала масавую вытворчасць беспілотнага таксі Cybercab

• 24.04.2026, 20:07

Карыстальнікі могуць пратэставаць навінку ў адным з гарадоў штата Тэхаса.

Амерыканская кампанія Tesla прыступіла да выпуску электрычнага беспілотнага аўтамабіля Cybercab. Пра гэта паведаміў кіраўнік кампаніі Ілон Маск у сваім уліковым запісе ў сацыяльнай сетцы X.

«Вытворчасць Cybercab пачалася», — напісаў прадпрымальнік, суправадзіўшы паведамленне 38-секундавым відэа, знятым, меркавана, з салона новага робатаксі. На іншым шасцісекундным роліку бачная калона гатовых аўтамабіляў.

Прэзентацыя двухмеснага электрамабіля без руля і педаляў адбылася ў кастрычніку 2024 года. Тады ў кампаніі заявілі, што кошт Cybercab складзе каля $30 тыс., а паездка на ім абыдзецца ў 30–40 цэнтаў за мілю. Да таго моманту было створана каля 50 працоўных прататыпаў, цалкам арыентаваных на аўтаномнае кіраванне.

З чэрвеня 2025 года Tesla ўжо прапануе паслугі робатаксі ў горадзе Остын штата Тэхаса, дзе наладжаны выпуск аўтамабіляў.