Пяць вар'яцкіх парад ад няўдалага аграрыя Лукашэнкі

• 27.04.2026, 13:06

Дыктатар выдае банальнасці за каштоўныя ўказанні.

Аляксандр Лукашэнка прыбыў у Нараўлянскі раён, каб праінспектаваць пасяўную. Судзячы з раздаваных парад, ён упэўнены, што без яго ў гэтай краіне ні пасеяць, ні пажаць не змогуць.

Блізкі да прэс-службы Лукашэнкі Telegram-канал прыводзіць яго «найкаштоўнейшыя» думкі, выказаныя падчас інспектавання «Эксперыментальнай базы «Крынічная»». «Салідарнасць» сабрала 5 найбольш важных.

Парада №1. «Трэба, каб была падрыхтавана глеба».

А мы-то думалі, што так па полі раскідаць. Дзякуй, Аляксандр Рыгоравіч!

Парада №2. «Цягнуць ужо не трэба, трэба сеяць».

Хацелі да лета пачакаць, але калі вы настойваеце...

Парада №3. «Галоўнае — гаспадарыць на зямлі і не забывацца пра культуру земляробства».

А так бы і далей займаліся бескультурным земляробствам.

Парада №4. Сховішчы мусяць быць зробленыя так, каб «замест сенажу не захоўваць гнілаж».

Дык во для чаго яны!

Парада №5. «Трэба арганізацыя і трэба чалавечае стаўленне да скаціны».

Хацелася б яшчэ, вядома, чалавечага стаўлення да чалавека, але гэта ўжо пасля скаціны.

Ну і напаследак вердыкт кіраўніка адносна ўбачанага на комплексе:

— Дорага. Трэба старацца танней. Прыдумаць схему, каб «зубамі грызлі цану». Так, можна сказаць, будуюць за свае грошы. Але ж мы датуем сельскую гаспадарку. Маглі б зэканоміць грошы для іншых праектаў.

Датуем? Маглі б зэканоміць на нешта іншае? Ды неее. Куды ж тады ездзіць раздаваць такія найкаштоўныя парады?!