Улады прайграюць вайну з «дармаедамі»
- 27.04.2026, 14:12
Ні ціск, ні «прафілактыка» не далі выніку.
Чарговыя «групавыя прафілактычныя мерапрыемствы» з беспрацоўнымі правялі ўлады двух раёнаў Гомельскай вобласці, заўважыў «Флагшток». Такія мерапрыемствы арганізуюць ужо больш за год, а «дармаедаў» не меншае. Мала таго, паводле прадстаўленай статыстыкі можна зрабіць выснову, што іх колькасць не змяншаецца, нягледзячы на велізарныя рэсурсы, затрачаныя на гэтую дзейнасць.
Газета «Чачэрскі веснік» паведаміла, што «кантынгент непрацуючых налічвае 850 чалавек, зарэгістраваных у базе даных». Гэта прыблізна 6% ад усяго насельніцтва раёна, колькасць якога складае каля 14 тыс. чалавек.
Іншай статыстыкі ўлады не прадстаўлялі, але раней, у самым пачатку «барацьбы з дармаедамі», называлі даныя па Савецкім раёне Гомеля — каля 10 тысяч «не занятых у эканоміцы» ў раёне з насельніцтвам каля 170 тыс. чалавек. Гэта амаль тыя ж самыя 6% насельніцтва раёна.
Параўнанне даных прамысловага раёна абласнога цэнтра і сельскагаспадарчага раёна не зусім карэктнае, але атрымліваецца, што доля «дармаедаў» прыкладна аднолькавая. Невядома, колькі першапачаткова было афіцыйна беспрацоўных у Чачэрскім раёне і колькі цяпер — у Савецкім раёне Гомеля, але як мінімум можна зрабіць выснову, што працэнт «незанятых у эканоміцы» на вёсцы застаецца высокім.
Яшчэ адно мерапрыемства з беспрацоўнымі правялі ў Буда-Кашалёўскім раёне. Там сабралі «асоб, не занятых у эканоміцы і якія пражываюць на тэрыторыях Крыўскага і Чабатавіцкага сельсаветаў», паведаміла газета «Авангард».
Беспрацоўным прадставілі вакансіі: у тым ліку ў КСУП «Крыўск», ААТ «Гомельлён», Буда-Кашалёўскім вузле паштовай сувязі, мясцовых школах. Ці ўдалося каго-небудзь уладкаваць на працу — не ўдакладняецца.
На сустрэчы начальнік АУС Буда-Кашалёўскага райвыканкама Аляксандр Міснікаў заявіў, звяртаючыся да беспрацоўных:
«Дзяржава дае вам магчымасць працаўладкавацца, і гэтым трэба карыстацца. Калі вы не працуеце — вы не прыносіце карысці дзяржаве».
Такія словы на адрас беспрацоўных можна лічыць прынамсі некарэктнымі.