Андрус Кубілюс: Еўропе патрэбны новы абаронны саюз

• 27.04.2026, 17:15

З удзелам Украіны.

Еўракамісар па пытаннях абароны Андрус Кубілюс заявіў, што цяпер сяброўства Украіны ў НАТА немагчыма. Таму больш эфектыўным рашэннем стала б стварэнне Еўрапейскага абароннага саюза, перадае Суспільне.

«Сяброўства ў НАТА для Украіны пакуль недаступнае. Паўнавартаснае сяброўства ў Еўрапейскім саюзе — гэта складаны працэс, які не можа гарантаваць хуткай інтэграцыі абаронных магчымасцяў.

Менавіта таму найбольш эфектыўным можа стаць пошук новага інструмента, які быў бы скіраваны менавіта на інтэграцыю ўсіх еўрапейскіх абаронных магчымасцяў», — адзначыў еўракамісар.

На думку Кубілюса, патрэбны Еўрапейскі абаронны саюз, які дазволіць інтэграваць абаронныя магчымасці Украіны, Вялікабрытаніі, Нарвегіі з абароннымі магчымасцямі краін-членаў Еўрапейскага саюза, якія гэтага жадаюць.

Паводле яго слоў, такая інтэграцыя магла б стаць надзейнай гарантыяй бяспекі для Украіны пасля дасягнення справядлівага міру, а таксама важнай асновай для яе паспяховага аднаўлення.

Акрамя таго, дадаў Кубілюс, адначасовая інтэграцыя Украіны ў адзіны рынак і Еўрапейскі абаронны саюз у найбліжэйшай будучыні стала б «неад’емнай часткай еўрапейскага стратэгічнага падыходу да Украіны».