Украінскія паштальёны працягваюць працу пад абстрэламі

• 27.04.2026, 17:29

Амаль усе адпраўленні дастаўляюцца своечасова, нягледзячы на баявыя дзеянні.

Нягледзячы на пастаянныя атакі, украінская паштовая служба «Укрпошта» застаецца адной з самых эфектыўных у Еўропе. Паводле дадзеных кампаніі, каля 98% адпраўленняў дастаўляюцца своечасова — нават ва ўмовах вайны, піша The Telegraph (пераклад — сайт Charter97.org).

Паштальёны працуюць літаральна на лініі фронту. У Харкаўскай вобласці, недалёка ад мяжы, супрацоўнікі штодня рызыкуюць жыццём. Адзін з іх, 59-гадовы Уладзімір Сямянэнка, успамінае, як нядаўна ледзь не загінуў падчас атакі трох расійскіх дронаў.

З пачатку поўнамаштабнай вайны загінулі 45 супрацоўнікаў пошты, разбураныя дзесяткі аддзяленняў і сотні аўтамабіляў. Тым не менш дастаўка працягваецца, а самі паштальёны пачалі ўспрымацца як нацыянальныя героі.

У аддаленых вёсках мабільныя паштовыя фургоны — адзіная сувязь з вонкавым светам. Праз іх жыхары атрымліваюць пенсіі, аплачваюць рахункі і купляюць прадукты, лекі і прадметы першай неабходнасці. Для многіх пажылых людзей гэта пытанне выжывання.

Праца адбываецца ў экстрэмальных умовах: дарогі разбураныя, вакол — акопы і супрацьтанкавыя загароды, а над галавой пастаянна кружляюць дроны. Часам нават рамень бяспекі не выкарыстоўваюць — каб паспець пакінуць машыну падчас атакі.

Для параўнання, брытанская «Royal Mail» не выконвае ключавыя паказчыкі дастаўкі і за апошнія гады атрымала шматмільённыя штрафы.

Аднак у самой кампаніі лічаць такія параўнанні некарэктнымі з-за адрозненняў у сістэмах дастаўкі.

Тым часам ва Украіне паштальёны працягваюць выконваць сваю працу, нягледзячы на небяспеку. Як кажа адзін з іх, каб атрымаць пенсію, спачатку трэба проста выжыць.