Мерц: Іран прыніжае ўсю амерыканскую нацыю

• 27.04.2026, 18:51

Канцлер Германіі раскрытыкаваў вайну ЗША на Блізкім Усходзе.

Канцлер Германіі Фрыдрых Мерц раскрытыкаваў вайну ЗША на Блізкім Усходзе, заявіўшы, што ў Вашынгтона няма стратэгіі ў дзеяннях супраць Ірана. Фрагменты яго выступлення ў гімназіі імя Карла Вялікага ў горадзе Марсберг прыводзіць n-tv.

Ён падкрэсліў, што досвед папярэдніх войнаў – у прыватнасці, у Афганістане і Іраку – паказвае, што праблема заўсёды ў тым, як пакласці канец канфлікту. Таму палітык лічыць вайну супраць Ірана «неабдуманай».

Канцлер дадаў, што не бачыць перспектыў завяршэння вайны, «паколькі іранцы, відавочна, мацнейшыя, чым меркавалася, а ў амерыканцаў яўна няма па-сапраўднаму пераканаўчай стратэгіі на перамовах».

«У дадзены момант я не бачу, якую стратэгію выхаду выбіраюць амерыканцы, асабліва ўлічваючы, што іранцы, відавочна, вельмі ўмела вядуць перамовы – або, хутчэй, вельмі ўмела іх не вядуць», – заявіў Мерц.

Ён дадаў, што «цэлая нацыя падвяргаецца прыніжэнню з боку іранскага кіраўніцтва, асабліва з боку так званай Рэвалюцыйнай гвардыі».

Мерц падкрэсліў, што Ізраіль і ЗША не раіліся з еўрапейцамі, пачынаючы атакі на Іран. Ён заявіў, што ўжо двойчы выказваў свой скептыцызм непасрэдна прэзідэнту ЗША Дональду Трампу.

«Каб я ведаў, што гэта будзе працягвацца пяць-шэсць тыдняў і будзе паступова пагаршацца, я сказаў бы яму пра гэта яшчэ больш катэгарычна», – сказаў канцлер. Ён адзначыў, што вайна наўпрост уплывае на нямецкую эканоміку.