Гнеў расіян абрынуўся на інтэрнэт-цэнзараў

• 29.04.2026, 11:50

Роскомнадзор стаў галоўнай мішэнню грамадскага незадавальнення.

У Расіі ўзмацняецца грамадскае незадавальненне з-за маштабных абмежаванняў інтэрнэту, якія ўжо закранаюць паўсядзённае жыццё — ад аплаты пакупак да працы мабільных сэрвісаў і таксі, піша CEPA (пераклад — сайт Charter97.org).

На гэтым фоне Роскомнадзор, які адказвае за інтэрнэт-цэнзуру, нечакана аказаўся ў цэнтры грамадскага гневу. Паводле даных расійскіх спецслужбаў, у красавіку была прадухіленая спроба нападу на супрацоўнікаў ведамства. Адзін з падазраваных быў забіты пры затрыманні ў Маскве, яшчэ некалькі чалавек арыштаваныя.

Раней адбыўся яшчэ адзін рэзанансны інцыдэнт — падлетак напаў з нажом на супрацоўніка Роскомнадзора, які памёр на месцы. Улады імкнуліся не афішаваць гэты выпадак.

Эксперты адзначаюць, што падобныя атакі сведчаць пра новую з’яву — упершыню цэнзары становяцца прамой мэтай агрэсіі. Раней адказнасць за абмежаванні традыцыйна асацыявалася з вышэйшым кіраўніцтвам краіны, а выканаўцы заставаліся ў цені.

Прычынай росту напружання называюць спалучэнне фактараў — зацягнутую вайну, пагаршэнне эканамічнай сітуацыі і ўзмацненне кантролю над інтэрнэтам. Асаблівае раздражненне выклікалі блакіроўкі Telegram і VPN-сэрвісаў, якімі карысталіся мільёны расіян для доступу да інфармацыі і замежных сэрвісаў.

Пры гэтым адкрытая крытыка ўлады і вайны застаецца надзвычай рызыкоўнай, таму незадавальненне пераносіцца на менш абароненыя дзяржаўныя структуры.

Аналітыкі папярэджваюць, што ўзмацненне ціску на грамадства і абмежаванне доступу да інфармацыі могуць прывесці да далейшай эскалацыі напружання і росту пратэсных настрояў.