Сына беларускага прапаведніка Сяргея Мельянца хочуць выдварзіць з Польшчы

• 29.04.2026, 18:32

Яго забралі з дому ў Варшаве памежнікі.

Старэйшага сына хрысціянскага прапаведніка і шматдзетнага бацькі Сяргея Мельянца проста з дому ў Варшаве забралі памежнікі. Паводле слоў Мельянца, яго хочуць дэпартаваць у Беларусь. Пра гэта паведаміла «Медыязона».

Як піша выданне, Івана Мельянца адвезлі ў аддзяленне памежнай службы аэрапорта імя Шапэна ў Варшаве. Сяргею ўдалося даведацца ад юрыста, які дапамагае іх сям'і, што сына памежнікі маюць намер пакінуць там на ноч, а раніцай будуць пачаты працэсуальныя дзеянні.

«Ці адпусцяць з прадпісаннем пакінуць Польшчу, ці неадкладная дэпартацыя ў Беларусь, ці змяшчэнне ў лагер для тых, каго ў найбліжэйшы час дэпартуюць», — лічыць Сяргей.

Сувязі з сынам у яго цяпер няма, карыстацца тэлефонам хлопцу забаранілі, аднак да яго дапусцілі юрыста.

Як Сяргей патлумачыў «Медыязоне», уся яго сям'я чакае рашэння па міжнароднай абароне ў Польшчы. Справу яго, ягонай жонкі і пяці яго непаўналетніх дзяцей разглядаюць асобна, справу яшчэ двух паўналетніх сыноў — асобна. Паўналетнім сынам, якія жывуць асобна ад бацькі, прыйшла позва на допыт у памежнікаў, аднак хлопцы своечасова не ўбачылі паведамленне ў паштовай скрыні.

У сувязі з гэтым, паводле слоў Мельянца, справу сыноў закрылі. Разам з юрыстам Сяргей з сынамі збіраліся звярнуцца да ўладаў, каб справу разгледзелі нанова, — аднак, верагодна, памежная служба прыняла рашэнне аб выдварэнні старэйшага сына раней.

Сяргей Мельянец — пратэстанцкі прапаведнік і актывіст з Мінска. Ён адзін з нямногіх, хто хадзіў на разгляды спраў па «палітычных» артыкулах, дапамагаў з рэстаўрацыйнымі працамі ў памяшканні сталічнай царквы, падтрымліваў тых, хто ў патрэбе.

У сакавіку 2024 года шматдзетнага бацьку затрымалі і двойчы адправілі на «суткі», хоць, як мяркуе ён сам, усё магло скончыцца і крымінальнай справай. Пасля вызвалення мужчына вырашыў з'ехаць з блізкімі за мяжу.