У Індыі мужчына прынёс у банк парэшткі сястры, каб даказаць яе смерць

• 30.04.2026, 2:00

У банку запатрабавалі пацвярджэнне смерці жанчыны, каб мужчына мог атрымаць доступ да яе зберажэнняў.

Мужчына з Усходняй Індыі заявіў, што яго прымусілі прынесці парэшткі сваёй сястры ў банк, каб даказаць яе смерць і атрымаць магчымасць зняць яе зберажэнні. Аб гэтым 29 красавіка паведаміла BBC, са спасылкай на мясцовыя СМІ.

Відэа з штата Адыша, на якім 52-гадовы Джыту Мунда нясе парэшткі сястры ў банк, было апублікавана ў сацсетках. Мунда заявіў журналістам, што дзейнічаў з адчаю пасля неаднаразовых спробаў атрымаць доступ да грошай (ідзецца пра эквівалент $200), не маючы магчымасці прадставіць афіцыйнае пацвярджэнне смерці.

Паліцыя пацвердзіла, што мужчына эксгумаваў парэшткі жанчыны, якая памерла на пачатку года, каб прынесці іх у банк.

У той жа час у банку аспрэчылі, што прасілі пра гэта, заявіўшы, што ад Мунды патрабавалі толькі дакументы, неабходныя паводле закона, каб пацвердзіць, што яго сястра памерла (мужчына сцвярджаў, што ў банку патрабавалі яе «фізічнай прысутнасці»).

У банку выказалі меркаванне, што прычынай інцыдэнту сталі недастатковыя веды мужчыны пра працэдуры, а таксама тое, што грошы на той момант ужо былі перададзены законным спадкаемцам. Мунда, са свайго боку, сцвярджае, што менеджар адмовіўся яго слухаць і «працягваў прасіць доказы». «Я прынёс шкілет, каб паказаць, што яна памерла», — сказаў ён BBC Hindi.

Пасля грамадскага рэзанансу міністр даходаў Адышы Сурэш Пуджары заявіў, што ўлады расследуюць інцыдэнт і кіраўнік аддзялення панясе пакаранне, калі яго віна будзе даказаная.