Клуб Аляксея Коласава працягне барацьбу за Кубак Стэнлі

• 30.04.2026, 15:11

«Філадэльфія Флайерз» выйшла ў наступны раунд плэй-оф НХЛ.

«Філадэльфія Флайерз», за якую выступае беларускі брамнік Аляксей Коласаў, перамагла «Пітсбург Пінгвінз» і выйшла ў чвэрцьфінал Кубка Стэнлі, піша Onlíner.

У пятым матчы серыі «Флайерз» перамагла з лікам 1:0. Адзіную шайбу ўжо ў авертайме закінуў Кэмерон Ёрк. Выніковы лік серыі — 4:1 на карысць «Філадэльфіі».

Коласаў у матчы ўдзелу не прымаў. У адрозненне ад яго, іншы беларус, Ілля Салавёў, які выступае за «Пітсбург», правёў на пляцоўцы 7 хвілін 48 секунд. Як піша «Беларускі хакей», ён заблакіраваў два кідкі і выканаў адзін сілавы прыём.

У чвэрцьфінале «Філадэльфія» згуляе з «Кароліна Харыкейнз».

У гэтым сезоне Салавёў выступаў за два клубы НХЛ: пачынаў у «Каларада Эвэланш», а заканчваў — у «Пітсбургу». Усяго на яго рахунку 30 матчаў, адна закінутая шайба і сем рэзультатыўных перадач.

Што да Коласава, ён правёў за «Філадэльфію» ўсяго чатыры матчы і часцей выступае за фарм-клуб «Ліхай Вэлі Фантомс».