Расіянец падмануў беларуску і бясплатна жыў у яе кватэры

• 30.04.2026, 15:30

Яна даведалася пра гэта па пакінутым смецці.

Жыхарка Магілёва пад нікам d.korsakovaa, якая здае сваю кватэру на суткі, распавяла ў Threads пра непрыемны досвед зносін з турыстамі з Расіі.

«Што з людзьмі адбываецца? — піша яна. — Здаём кватэру, госці забраніравалі праз @sutochno, двое дарослых і дзіця 7 гадоў. Падрыхтавалі кватэру, папярэдзілі, што пад'ехаць не зможам, каб госці засяліліся самі. Прыходзіць адмена браніравання ў гэты ж дзень, усё як мы любім, але гэта паўбяды, усякае бывае. Пасля працы мама заходзіць у кватэру — і карціна алеем: у ваннай — мокры ручнік, у смеццевым вядры — пакет, валасы на падлозе».

Гаспадыня кватэры звязалася з арандатарам. Той у адказ на справядлівыя прэтэнзіі толькі пацікавіўся, якое смецце яны пакінулі.

Каментатары ўдакладнілі, адкуль прыбылі госці, на што аўтарка паста адказала, што яны — расіяне. За пражыванне турысты не заплацілі.