Пашынян заменіць расійскіх памежнікаў на армянскіх

• 30.04.2026, 21:49

Расіяне ахоўваюць мяжу Арменіі з Турцыяй і Іранам.

Армянскія памежнікі будуць замяняць расійскіх памежнікаў, якія цяпер ахоўваюць мяжу Арменіі з Іранам і Турцыяй. Пра гэта паведаміў прэм’ер-міністр Арменіі Нікол Пашынян.

Пашынян адзначыў, што армянскі бок плаціць расійскім памежнікам за іх працу, пры гэтым прадстаўнікі РФ падымалі пытанне павелічэння кошту за гэтыя паслугі. У Ерэване прыйшлі да высновы аб неабходнасці траціць павялічаныя сумы на развіццё ўласнага памежнага патэнцыялу.

«Паступова расійскія калегі ўкладуцца ў тыя сумы, якія не будуць для нас занадта абцяжарлівымі. А мы возьмем пад кантроль астатнія ўчасткі. Гэта прадугледжана дагаворам», — сказаў прэм’ер.

У лютым Нікол Пашынян прапанаваў расійскім уладам прадаць канцэсію на чыгуначныя дарогі Арменіі адной з краін, сяброўскіх абедзвюм дзяржавам. Прэм’ер падкрэсліў, што Арменія «нічога не мае супраць Расіі», аднак расійская канцэсія стварае «пэўныя канкурэнтныя страты» для ягонай краіны.