У нямецкім горадзе загадкава знікла вядомая славутасць

• 5.04.2026, 9:27

А потым гэтак жа раптоўна вярнулася.

У нямецкім Мюнхене нечакана вярнулася папулярная сярод турыстаў славутасць — сёрф-хваля на ручаі Айсбах, якая знікла пасля ачысткі русла восенню. Цяпер сёрферы зноў выходзяць на ваду, аднак пакуль ніхто не можа патлумачыць, чаму яна аднавілася сама, піша Deutshe Welle.

У Англійскім садзе ў Мюнхене зноў катаюцца сёрферы. Восенню русла ручая Айсбах вырашылі пачысціць, і іх хваля знікла; некалькі разоў яе спрабавалі вярнуць, але не асабліва паспяхова. І вось цяпер яна з'явілася — трывалая і моцная. Чаму — пакуль невядома. Затое вядома, што раней былі спробы ўсталяваць нелегальныя канструкцыі на ручаі, каб вярнуць хвалю.

Дарэчы, новы бургамістр Мюнхена Домінік Краўзэ абяцаў, што хвалю афіцыйна адкрыюць не пазней за пачатак летніх канікул. Але не ўдакладняў, як менавіта яе адновяць. Краўзэ сказаў, што горад па гэтым пытанні мае зносіны з сёрф-супольнасцю і ўніверсітэцкімі экспертамі.

«Хваля Айсбах — гэта выраз нязмушанага ладу жыцця нашага горада і сапраўдная славутасць. Мая мэта — каб сёрфінг неўзабаве зноў стаў магчымым», — кажа Краўзэ.

Дзякуючы гэтай хвалі Мюнхен лічыцца нямецкай сталіцай сёрфінгу. Аднак улады закрылі спот на ручаі Айсбах пасля трагічнага выпадку ў красавіку 2025 года, калі 33-гадовая сёрферка звалілася з дошкі і заблыталася ў страхоўным тросе, прывязаным да яе нагі. Жанчыну змаглі выцягнуць з ракі толькі прыбылыя выратавальнікі. Яна памерла ў бальніцы праз тыдзень пасля здарэння.