Еўрапарламент падтрымаў стварэнне спецыяльнага трыбуналу для РФ

• 1.05.2026, 6:03

Дэпутаты патрабуюць пакараць расійскае кіраўніцтва за вайну ва Украіне.

Еўрапарламент прыняў рэзалюцыю, у якой заклікаў прыцягнуць кіраўніцтва Расіі да адказнасці за вайну супраць Украіны і ўзмацніць санкцыі.

Пра гэта паведамляе сайт Еўрапарламента.

Адпаведную рэзалюцыю падтрымалі 446 дэпутатаў, 63 выступілі супраць, яшчэ 52 устрымаліся. У дакуменце Еўрапарламент рашуча асуджае сістэматычныя ўдары Расіі па грамадзянскіх аб'ектах, у прыватнасці па жылых дамах, бальніцах і энергетычнай інфраструктуры.

«Парламент заяўляе, што агрэсіўная вайна Расіі з'яўляецца грубым парушэннем міжнароднага права і што кіраўнікі Расіі і яе саюзнікаў павінны быць прыцягнутыя да адказнасці за сваю ролю ў злачынстве агрэсіі, ваенных злачынствах, злачынствах супраць чалавечнасці і іншых міжнародных злачынствах», — гаворыцца ў заяве.

Еўрапарламент падтрымаў стварэнне спецыяльнага трыбуналу па злачынстве агрэсіі супраць Украіны і заклікаў усе краіны ЕС далучыцца да гэтай ініцыятывы.

У дакуменце таксама гаворыцца пра неабходнасць прыцягнення да адказнасці не толькі вышэйшага кіраўніцтва, але і іншых службовых асоб, якія спрыялі здзяйсненню злачынстваў.

Акрамя таго, дэпутаты Еўрапарламента выступілі за пашырэнне санкцый ЕС супраць Расіі і адзначылі, што абмежаванні не павінны адмяняцца да поўнай рэалізацыі мірнага пагаднення.

Еўрапарламент асобна падтрымаў стварэнне Міжнароднай камісіі па прэтэнзіях для Украіны, якая павінна забяспечыць выплату кампенсацый грамадзянскім ахвярам вайны. Рашэнне падтрымалі 465 дэпутатаў.

Пасля адабрэння парламентам краіны ЕС павінны прыняць канчатковае рашэнне аб стварэнні гэтай камісіі.