У расійскага мільярдэра Машковіча канфіскуюць актывы

• 1.05.2026, 18:05

Крэмль узмацняе ціск на буйны бізнес.

У мільярдэра Вадзіма Машковіча, заснавальніка аграхолдынгу «Русагро», які з сакавіка мінулага года знаходзіцца ў СІЗА па абвінавачанні ў дачы хабару і махлярстве, будзе канфіскавана маёмасць на некалькі мільярдаў рублёў.

Як паведамляе «Інтэрфакс», пазоў да Машковіча аб канфіскацыі маёмасці 4 мая разгледзіць Хамоўніцкі суд Масквы. Акрамя Машковіча, стан якога Forbes ацэньвае ў $2,9 млрд, адказчыкам па справе з’яўляецца Максім Басаў, экс-гендырэктар «Русагро».

У даход дзяржавы плануецца перадаць рухомую і нерухомую маёмасць, зямельныя ўчасткі, грашовыя сродкі, а таксама актывы кампаній, што належаць адказчыкам; іх агульны кошт перавышае некалькі мільярдаў рублёў, — удакладніла крыніца «Інтэрфакса» ў праваахоўных органах.

Ці ўваходзіць у пералік сам холдынг «Русагро», які з’яўляецца адным з найбуйнейшых у Расіі вытворцаў цукру, займае 2-е месца паводле вытворчасці мяса, а таксама валодае 700 тыс. га сельскагаспадарчых земляў, крыніца «Інтэрфакса» не ўдакладніла.

58-гадовы Машковіч, які ўваходзіць у топ-60 найбагацейшых людзей Расіі, быў затрыманы вясной мінулага года. Па версіі следства, Машковіч і Басаў набылі 85% акцый ГК «Солнечные продукты» па заніжанай цане ў абмен на выкуп доўгу і інвестыцыі, аднак не выканалі свае абавязацельствы. Пазней, як лічыць следства, Машковіч даў хабар у выглядзе паляўнічага карабіна коштам 2,6 млн рублёў былому намесніку кіраўніка адміністрацыі Тамбоўскай вобласці Сяргею Іванову. У красавіку суд арыштаваў па справе актывы на суму больш за 6,7 млрд рублёў.

Затрыманне Машковіча, кіраўніка «Русагро», звязваюць з планамі канфіскаваць яго кампанію, раней распавядалі «Новай газеце. Еўропа» крыніцы на аграрным рынку. Паводле іх слоў, за атакай на мільянера можа стаяць клан Патрушавых, які імкнецца прыбраць да рук буйныя актывы ў харчовым сектары і сельскай гаспадарцы.

Пад ціскам уладаў, якія ўключылі «Русагро» ў пералік стратэгічных прадпрыемстваў і пагражалі прызнаць самога Машковіча «замежным агентам», бізнесмен добраахвотна перавёў свае актывы з Кіпра ў Расію — праз працэс рэдаміцыляцыі. Але неўзабаве пасля гэтага сутыкнуўся з прэтэнзіямі сілавікоў, якія запусцілі найбуйнейшы з часоў прыватызацыі 1990-х перадзел уласнасці.

У 2025 годзе па пазовах Генпракуратуры былі нацыяналізаваныя 32 стратэгічныя прадпрыемствы на 2,5 трлн рублёў, — дакладваў у красавіку генпракурор Аляксандр Гуцан. У сакавіку Гуцан паведамляў прэзідэнту Уладзіміру Пуціну аб выманні прыватных кампаній на 4 трлн рублёў. Паводле дадзеных Росімушчества, да сярэдзіны сакавіка ў Расіі былі нацыяналізаваныя 805 кампаній. Сярод іх — аўтадылер «Рольф», «Чалябінскі электраметалургічны камбінат» (ЧЭМК), «Южуралзолото», найбуйнейшы ў краіне збожжавы трэйдар «Родные поля», найбуйнейшы аператар складоў Raven Russia, аэрапорт «Дамадзедава», а таксама парты Петрапаўлаўска-Камчацкага, Мурманска і Калінінграда.

«Іх замежныя ўладальнікі дзейнічалі на шкоду інтарэсам Расіі, выводзілі дывідэнды за мяжу, ухіляліся ад сплаты падаткаў, павялічвалі крэдыторскую запазычанасць», а таксама «спансіравалі ВСУ і іншую антырасійскую дзейнасць», — казаў Гуцан.