Пуцін знерваваўся з-за Арменіі

• 10.05.2026, 10:23

У Крамлі абяцаюць Ерэвану «ўкраінскі сцэнар».

Расійскі дыктатар Уладзімір Пуцін раскрытыкаваў Арменію, папярэдзіўшы Ерэван аб «недапушчальнасці» курсу на еўраінтэграцыю без узгаднення з Крамлём.

Пра гэта ён заявіў падчас прэс-канферэнцыі 9 мая, паведамляе Charter97.org са спасылкай на расСМІ.

Кіраўнік Крамля сцвярджае, што падобная палітыка можа прывесці да сцэнара, падобнага да падзей ва Украіне ў 2014 годзе, маючы на ўвазе расійскае ўзброенае ўварванне.

На яго думку, Арменія павінна ўлічваць пазіцыю Масквы ў пытаннях еўраінтэграцыі, таму Пуцін лічыць мэтазгодным правесці рэферэндум. Таксама кіраўнік Крамля заявіў, што такое рашэнне было б правільным як для саміх грамадзян Арменіі, так і для «галоўнага эканамічнага партнёра» — Расіі.

«На мой погляд, было б правільна і ў дачыненні да насельніцтва, грамадзян Арменіі, і ў дачыненні да нас, як галоўнага эканамічнага партнёра, вызначыцца як мага раней, напрыклад, правесці рэферэндум», — заявіў Пуцін.

Пры гэтым ён дадаў, што хоць гэта і «не наша справа», але ў прынцыпе цалкам было б лагічна правесці рэферэндум і спытаць у грамадзян Арменіі, якім будзе іх выбар.

«Адпаведна, і мы зрабілі б адпаведныя высновы і пайшлі б шляхам мяккага, інтэлігентнага і ўзаемавыгаднага разводу», — адзначыў дыктатар.

У той жа час ён папярэдзіў пра магчымыя наступствы ў выпадку іншага развіцця падзей, правёўшы паралель з Украінай.

«Мы цяпер перажываем усё, што адбываецца на ўкраінскім напрамку. А з чаго пачалося? З уступлення або спробы ўступлення Украіны ў ЕС», — сказаў Пуцін і падкрэсліў, што ўсё гэта прывяло пасля да «дзяржперавароту, крымскай гісторыі, пазіцыі паўднёва-ўсходу Украіны і баявых дзеянняў».