Адваротны бок Месяца паказалі ў нябачаных дэталях

• 13.05.2026, 12:35

Унікальныя кадры спадарожніка Зямлі.

Астрафатограф Эндру Маккарті за некалькі тыдняў да старту «Артэміды-II» напісаў камандзіру экіпажа Рыду Уайсмену. Ён прапанаваў зняць Месяц так, як гэта робяць астрафатографы на Зямлі. Уайсмен адразу згадзіўся. Разам са спецыялістамі НАСА, якія рыхтавалі астранаўтаў да працы з камерамі на борце Orion, яны распрацавалі план здымкі, піша «Хайтэк».

Падчас пралёту каля Месяца Уайсмен рабіў серыі кадраў з рознай экспазіцыяй і ў розныя моманты палёту. Пасля вяртання Маккарті аб’яднаў здымкі метадам стэкінгу — накладаннем мноства кадраў адзін на адзін. Выпадковы шум пры гэтым знікае, а карысная інфармацыя застаецца. Так выявяюцца найтанчэйшыя адрозненні ў колеры і складзе паверхні Месяца. Блакітныя адценні сведчаць пра базальтавыя пароды, багатыя тытанам. Карычневыя і чырванаватыя вобласці звязаныя з жалезам і старажытным выветраным грунтам.

Маккарті падкрэсліў: на здымках няма мастацкай інтэрпрэтацыі. Усе колеры існуюць насамрэч, проста чалавечае вока недастаткова адчувальнае да іх. На Зямлі астрафатографу даводзіцца аб’ядноўваць сотні, а часам і тысячы кадраў — атмасферныя скажэнні істотна пагаршаюць выявы. Здымка з космасу дала значна больш якасны зыходны матэрыял.

Місія «Артэміда-II» пачалася 1 красавіка і завершылася 10 красавіка. Чатыры астранаўты правялі ў палёце да Месяца і назад дзесяць дзён. НАСА выклала больш за 12 тысяч фатаздымкаў. Маккарті прызнаўся, што паспеў апрацаваць толькі нязначную частку і паабяцаў працягнуць працу.