«Атрымліваецца нонсэнс»
- 13.05.2026, 12:57
У Лукашэнкі сапраўдны кадравы голад.
12 мая Аляксандр Лукашэнка даў згоду на прызначэнне Руслана Пархамовіча старшынём Гомельскага гарвыканкама. Да гэтага ён займаў пасаду памочніка Лукашэнкі — інспектара па Гомельскай вобласці. То бок, па сутнасці быў у кантрольных органах, піша «Флагшток».
З размовы Лукашэнкі з Пархамовічам, прыведзенай у дзяржаўных СМІ, вынікае, што той сам хацеў атрымаць пасаду старшыні гарвыканкама:
«Я больш схільны да практычнай дзейнасці. Паспрабаваў сябе ў розных іпастасях. Але праца „ў полі“, напэўна, для мяне больш зручная. Я дастаткова глыбока пагружаны ў сітуацыю ў другім па велічыні горадзе нашай краіны. Бачу, што ёсць перспектывы для горада. Трэба заняцца камунальнай гаспадаркай, будаўніцтвам. Трэба заняцца ў тым ліку і аховай здароўя ды адукацыяй. Ёсць апорныя пункты. Але рэзерваў у горада дастаткова».
Прыкметай таго, што перамешчаны год таму з Мінска ў Гомель чыноўнік намерваецца асесці ў абласным цэнтры, можа служыць той факт, што для ягонай жонкі яшчэ паўгода таму падабралі ў Гомелі непыльнае месца, пра што распавядалі журналісты, — пасаду галоўнага ідэолага аўтапарка.
Сам факт прызначэння кіраўніком выканкама чыноўніка з кантрольнага органа агаляе старую праблему з кадрамі: топ-чыноўнікаў бракуе. Атрымліваецца нонсэнс: раней Пархамовіч кантраляваў старшыню аблвыканкама Івана Крупко, а цяпер пераведзены да яго ў падпарадкаванне.
Негатыўным фактарам можна назваць і тое, што для Пархамовіча горад чужы — нарадзіўся ён у Магілёве, там і працаваў, а затым — у Мінску.
Што да Уладзіміра Прывалова, які кіраваў Гомелем з 2022 года, дык для яго адстаўка, падаецца, таксама была жаданай. Наколькі вядома «Флагштоку», ужо цягам года ў мясцовых органах улады мусіравалася інфармацыя пра тое, што Прывалаў меціць у Мінск, каб перайсці на новы ўзровень кар’ернай лесвіцы.
Паводле звестак, якія пераказваюць адзін аднаму ў выканкамах і адміністрацыях, у Прывалова ёсць знаёмы ў адным з міністэрстваў, які лабіяваў яго перавод у сталіцу.
Аднак афіцыйнай інфармацыі пра якую-небудзь новую пасаду Прывалова пакуль няма.