НПЗ у Пермі цалкам спыніў працу пасля атак Украіны

• 13.05.2026, 14:16

Завод быў атакаваны не менш як тройчы.

Адзін з найбуйнейшых нафтаперапрацоўчых заводаў Расіі пасля серыі ўкраінскіх атак цалкам спыніў працу.

Пра гэта паведамляе Reuters.

7 мая ўкраінскія беспілотнікі атакавалі «Лукойл-Пермнефтеоргсинтез» — адзін з найбуйнейшых заводаў Расіі, размешчаны прыкладна за 1460 кіламетраў на ўсход ад Масквы. У выніку ўдару ўзнік пажар і было пашкоджана абсталяванне.

Пасля гэтага завод цалкам спыніў перапрацоўку нафты.

Крыніцы ў галіне паведамілі, што пасля ўдару тэрмінова вывелі з эксплуатацыі тры асноўныя ўстаноўкі першаснай перапрацоўкі сырой нафты. Акрамя таго, спыненая частка другасных установак.

Адзін з блокаў — CDU-4 — не працаваў яшчэ з 30 красавіка з-за папярэдняй атакі дрона.

Колькі працягнецца рамонт

Паводле звестак крыніц, аднаўленчыя работы могуць заняць некалькі тыдняў. «Лукойл», якому належыць завод, не адказаў на запыт аб каментары.

Губернатар Пермскага краю Дзмітрый Махонін пацвердзіў, што ў пятніцу беспілотнікі атакавалі прамысловыя аб’екты ў рэгіёне, аднак не ўдакладніў, якое менавіта прадпрыемства пацярпела.

Што вырабляў завод

У 2024 годзе «Лукойл-Пермнефтеоргсинтез» перапрацаваў каля 12,6 мільёна тон нафты. Сярод прадукцыі:

2 мільёны тон бензіну;

5,3 мільёна тон дызельнага паліва;

700 000 тон коксу;

200 000 тон мазуту.

Завод забяспечваў палівам як грамадзянскі сектар, так і патрэбы арміі.

Мэта такіх удараў — скараціць паступленні ў расійскі бюджэт і аслабіць ваенны патэнцыял Масквы. Акрамя таго, Крамль вымушаны траціць мільярды на аварыйнае аднаўленне стратэгічных аб’ектаў у глыбокім тыле.

У ноч на 8 мая спецыялісты Цэнтра спецыяльных аперацый «Альфа» СБУ нанеслі трэці ўдар па тым жа НПЗ і нафтаперапампоўчай станцыі «Пермь» — ключавы вузел, праз які нафта размяркоўваецца ў чатырох напрамках.

А 13 мая ў суседнім Башкартастане ўспыхнула ЛПДС «Нурлино» — адзін з найбуйнейшых нафтатранспартных вузлоў «Транснефть»; прычыны пажару пакуль не вызначаныя.