Завод у Гомелі выпусціў печ-ракету

• 13.05.2026, 18:32

Яе хочуць прадаваць за 170 рублёў.

Пячку для пікнікоў у выглядзе ракеты выпусціў завод «Камунальнік». Сваю навінку прадпрыемства плануе паказаць на Гомельскім эканамічным форуме напрыканцы мая, піша belkagomel.by.

Вытворца разлічвае, што тавар будзе карыстацца попытам у дачнікаў і аматараў адпачынку на прыродзе. Пячка працуе на дровах або пелетах. Зверху на металічную трубу можна ўсталяваць казан і гатаваць ежу.

Падобныя пячкі ўжо выпускаюцца іншымі вытворцамі, асаблівасць варыянта ад гомельскага завода — памер.

«Узор, які мы рыхтуем для прэзентацыі на юбілейным ХХ эканамічным форуме, будзе вельмі маленькі, практычна „чамаданны“. Такую пячку можна без цяжкасцей браць з сабою ў паездкі», — удакладніў дырэктар завода «Камунальнік» Уладзіслаў Кавалёў.

Прыблізны кошт вырабу — 170 рублёў.