The Telegraph: Паражэнні на фронце і заняпад эканомікі ператвараюць Пуціна ў параноіка

• 14.05.2026, 8:29

Бальшыню часу ён праводзіць у бункеры.

Атмасфера ўнутры Крамля становіцца ўсё больш параноідальнай на фоне няўдач на фронце ва Украіне і нарастаючых праблем у расійскай эканоміцы. Пра гэта піша The Telegraph.

Выданне адзначае, што наяўныя даныя сведчаць пра істотнае знясіленне расійскай ваеннай машыны пасля некалькіх гадоў наступальных аперацый і вялікіх страт.

Паводле інфармацыі амерыканскага Інстытута вывучэння вайны, у красавіку расійская армія ўпершыню з часоў украінскай аперацыі ў Курскай вобласці ў жніўні 2024 года страціла больш тэрыторый, чым акупавала. Ды і ў цэлым за апошнія шэсць месяцаў расійскія войскі захапілі значна менш тэрыторый, чым за аналагічны перыяд годам раней.

The Telegraph піша, што калі цяперашнія тэмпы наступу захаваюцца, Расіі спатрэбяцца дзесяцігоддзі для поўнага захопу Данбаса, які Крэмль называе ключавой умовай любога мірнага пагаднення. Пры гэтым, як тлумачаць аналітыкі, у бліжэйшай перспектыве гэтая сітуацыя прынцыпова не зменіцца, бо дамінаванне дронаў у паветры не дае Расіі магчымасці рэалізаваць сваю колькасную перавагу і здзейсніць стратэгічны прарыў дзе-небудзь на фронце.

У публікацыі адзначаецца, што расійская армія церпіць ад праблем з лагістыкай і сувяззю на фронце, а яе страты ўжо дасягаюць астранамічных маштабаў. Паводле падлікаў незалежных расійскіх журналістаў, Расія страціла толькі загінулымі больш за 350 тысяч салдат. Пры гэтым тэмпы набору новых кантрактнікаў ужо не кампенсуюць страт.

На гэтым фоне ўсё больш адчуваюцца праблемы ў расійскай эканоміцы. The Telegraph піша, што ў першым квартале 2026 года эканоміка РФ скарацілася на 0,3% на фоне падзення даходаў ад нафты і газу і аслаблення дзелавой актыўнасці.

Улічваючы гэтыя ваенныя праблемы і эканамічныя нелады, «атмасфера ў Крамлі становіцца ўсё больш параноідальнай», — гаворыцца ў публікацыі. Журналісты спасылаюцца на нядаўна апублікаваны даклад выведкі адной з еўрапейскіх краін, у якім сцвярджаецца, што Пуцін праводзіць значную частку часу ў бункерах, пазбягае выкарыстання прыладаў з доступам да інтэрнэту і амаль цалкам засяродзіўся на штодзённых ваенных нарадах.

Нягледзячы на гэта, украінскія вайскоўцы папярэджваюць, што гаварыць пра хуткі крах Расіі пакуль рана. Камандзіры ЗСУ мяркуюць, што Масква можа рыхтаваць новыя наступальныя аперацыі з надыходам больш сухога надвор'я. Аднак, як падсумоўвае выданне, вобраз «няўмольнай расійскай сілы і неабмежаваных чалавечых рэсурсаў», які Пуцін гадамі спрабаваў дэманстраваць свету, паступова пачынае руйнавацца.