Жыхар Гродна заплаціў за аўтамабіль усяго 165 рублёў

• 14.05.2026, 8:41

Далей пачаліся сюрпрызы.

У Гродне вынеслі прысуд мужчыну, які набываў аўтамабілі ў растэрміноўку, не збіраючыся за іх плаціць. Атрымаўшы машыны па дагаворах куплі-продажу з адтэрміноўкай аплаты, ён перапрадаваў іх іншым людзям. Суд прызначыў яму паўтара года калоніі строгага рэжыму, піша «Зеркало».

Крымінальную справу разгледзеў суд Ленінскага раёна Гродна. Абвінавачаным аказаўся раней судзімы мясцовы жыхар, у тым ліку ўжо прыцягваўся за махлярства.

2 лістапада 2024 года мужчына дамовіўся аб куплі аўтамабіля Daewoo Lanos у растэрміноўку. Паводле ўмоў дамовы ён павінен быў разлічыцца за машыну да 2 снежня, аднак першапачаткова не збіраўся выконваць абавязацельствы і не меў грошай на куплю. Атрымаўшы аўтамабіль, гродзенец прадаў яго іншаму чалавеку. Шкоду ўладальніцы ацанілі ў 3600 рублёў.

Праз некалькі тыдняў, 19 лістапада, мужчына аналагічным спосабам набыў Volkswagen Passat. Ён аформіў дамову з адтэрміноўкай аплаты да лютага 2025 года і для выгляду перадаў уладальніку 165 рублёў, пасля чаго перастаў плаціць. Гэты аўтамабіль ён таксама перапрадаў. Пацярпелы страціў маёмасць на суму 1980 рублёў.

У судзе абвінавачаны цалкам прызнаў віну і пакаяўся. Абцяжарваючай акалічнасцю стала тое, што на момант здзяйснення злачынстваў яго судзімасць яшчэ не была пагашаная.

Пры прызначэнні пакарання суд улічыў наяўнасць у мужчыны малалетняга дзіцяці і прызнанне віны.

У выніку яго прызналі вінаватым у махлярстве, здзейсненым паўторна, і прыгаварылі да аднаго года і шасці месяцаў пазбаўлення волі ў калоніі строгага рэжыму.

Акрамя таго, суд пастанавіў спагнаць з асуджанага 2000 рублёў кампенсацыі маральнай шкоды на карысць адной з пацярпелых, а таксама 135 рублёў дзяржаўнай пошліны. Прысуд уступіў у законную сілу.