У ISW папярэдзілі пра новы план Пуціна

• 14.05.2026, 11:03

«Нулёвая фаза» ўжо пачалася.

Дзяржаўная дума краіны-агрэсаркі Расіі прыняла законапраект, які надае дыктатару Уладзіміру Путіну паўнамоцтвы на правядзенне экстратэрытарыяльных ваенных аперацый дзеля абароны грамадзян РФ за мяжой. Пра гэта гаворыцца ў справаздачы аналітыкаў Інстытута вывучэння вайны.

Адзначаецца, што гэты закон устанаўлівае інфармацыйныя і прававыя ўмовы для апраўдання Расіяй будучай ваеннай дзейнасці за мяжой пад выглядам абароны грамадзян Расіі пасля таго, як Пуцін асабіста падпіша законапраект.

«Крэмль неаднаразова сцвярджаў, што замежныя дзяржавы нібыта ўціскаюць правы рускамоўных і этнічных рускіх, у прыватнасці ў Малдове, краінах Балтыі і Украіне, каб апраўдаць ваеннае ўмяшанне Расіі, і рабіў аналагічныя заявы аб пераследзе рускамоўных і этнічных рускіх краінамі Балтыі», — гаворыцца ў справаздачы.

На думку аналітыкаў, новы закон з'яўляецца палітычным сігналам, бо падобныя рашэнні прымаліся незадоўга да анексіі Крыму і поўнамаштабнага ўварвання ва Украіну.

У ISW дадаюць, што «нулёвая фаза» такой падрыхтоўкі ў Расіі ўжо пачалася. У прыватнасці, перабудоўваюцца ваенныя акругі, ствараюцца базы на мяжы з Фінляндыяй, а ў Еўропе фіксуюцца дыверсіі, глушэнне GPS і іншыя правакацыі.