У Беларусі змянілі правілы праходжання тэхагляду

• 14.05.2026, 20:10

Пры куплі патрыманага аўтамабіля праходзіць новы тэхагляд больш не трэба.

У Беларусі змянілі некаторыя правілы праходжання тэхагляду транспарту, паведаміла прэс-служба ўрада.

Найбольш істотная навіна — цяпер пры куплі патрыманага аўтамабіля не трэба будзе паўторна праходзіць тэхагляд, калі на аўтамабіль ужо ёсць дзеючы дазвол на допуск да ўдзелу ў дарожным руху. Гэта значыць, што новы ўладальнік зможа карыстацца аўтамабілем без дадатковай працэдуры праверкі.

Таксама змянілі арганізацыю, якая будзе выдаваць дазволы на працу дыягнастычных станцый — гэтыя функцыі перадаюцца Транспартнай інспекцыі Міністэрства транспарту і камунікацый.

Акрамя таго, скасоўваюцца абмежаванні па пераліку юрыдычных асоб, якія могуць праводзіць выпрабаванні спецыяльнага транспарту, напрыклад рэфрыжэратараў і ізатэрмічных фургонаў.

У дакуменце таксама змяшчаюцца іншыя тэхнічныя і арганізацыйныя змены ў сістэме тэхагляду.