Камандуючы Узброенымі сіламі Германіі пра вайну паміж Расіяй і НАТА: усё ўказвае на адну дату

• 15.05.2026, 10:17

Якую?

Расія можа атрымаць магчымасць напасці на краіны НАТА ў бліжэйшыя гады. Пра гэта заявіў генеральны інспектар Бундэсвера Карстэн Бройер у сумесным з брытанскім калегам Рычардам Найтанам інтэрв’ю газеце Süddeutsche Zeitung.

Адказваючы на пытанне, ці здольны расійскі дыктатар Уладзімір Пуцін напасці на НАТА, Бройер адзначыў, што ў 2029 годзе Расія будзе ў стане здзейсніць напад на НАТА, аднак гэта можа адбыцца нават раней.

«Розныя паказчыкі — узбраенне, павелічэнне колькасці асабовага складу, эканамічныя і палітычныя змены — указваюць на адну дату: 2029 год. Ці можа гэта адбыцца раней? Так.

Менавіта таму нам патрэбныя, па-першае, гатоўнасць да неадкладнага ўступлення ў бой; па-другое, нарошчванне баяздольнасці да 2029 года; і, па-трэцяе, тэхналагічная перавага да 2035 года і далей. Новая ваенная стратэгія і профіль баяздольнасці вызначаюць шлях наперад», — дадаў камандуючы.

Найтон таксама падкрэсліў, што РФ можа напасці на адну з краін НАТА, аднак дакладную дату прадказаць цяжка.

«Але тэндэнцыя відавочная: пагроза ўзмацняецца. Расія вядзе баёвыя дзеянні ва Украіне, робіць высновы з гэтага вопыту і распрацоўвае новыя тэхналогіі. А Пуцін прадэманстраваў сваю гатоўнасць нападаць на суверэнныя дзяржавы. Чым бліжэй да расійскай мяжы, тым мацней гэта адчуваецца», — адзначыў Найтон.

Старшыня Ваеннага камітэта НАТА (2021–2025), член Савета бяспекі Кіеўскага форуму па бяспецы адмірал Роб Баўэр раней заяўляў, што без падтрымкі Кітая Расія не змагла б весці вайну супраць Украіны ў цяперашніх маштабах. І калі рашэнне аб нападзе на НАТА і будзе прынятае, яно паступіць з Пекіна, Масква не здольная самастойна прымаць такія рашэнні.