Кіраўнік МЗС Украіны прызначыў дыпламата для працы з беларускай апазіцыяй

• 15.05.2026, 13:13

Што пра яго вядома?

Міністр замежных спраў Андрэй Сыбіга прызначыў Яраслава Чарнагора паслом па асаблівых даручэннях для ўзаемадзеяння з дэмакратычнымі сіламі Беларусі і іншых недружалюбных краін.

Пра гэта паведаміў сам дыпламат у сваіх сацсетках.

Яраслаў Чарнагор будзе адказваць за пытанні дэмакратычных пераўтварэнняў, узаемадзеяння з дэмакратычнымі сіламі і нацыянальнымі рухамі недружалюбных краін.

Раней прэзідэнт Украіны Уладзімір Зяленскі анансаваў стварэнне асобнай пасады спецыяльнага прадстаўніка па Беларусі, аднак такое прызначэнне пакуль не адбылося.

Яраслаў Чарнагор з'яўляецца кандыдатам гістарычных навук і дырэктарам Праграмы расійскіх і беларускіх даследаванняў Рады знешняй палітыкі «Украінская прызма».

Ён займаецца даследаваннямі знешняй палітыкі Украіны, інфармацыйнай бяспекі, супрацьдзеяння расійскай прапагандзе, а таксама палітычных працэсаў у Беларусі і Расіі.