У Расіі рэзка скарацілася колькасць зняволеных
- 15.05.2026, 17:29
Калоніі спустэлі пасля масавай адпраўкі зэкаў на вайну супраць Украіны.
У Расіі рэзка скарацілася колькасць зняволеных у турмах і СІЗА, дасягнуўшы мінімуму з пачатку 2000-х гадоў, піша The Moscow Times. «Калі на канец 2021 года было 465 тыс. [зняволеных], то цяпер — 282 тыс., з іх 85 тыс. — у СІЗА і памяшканнях, што функцыянуюць у рэжыме следчага ізалятара», — паведаміў дырэктар Федэральнай службы выканання пакаранняў (ФСІН) Аркадзь Гостеў. Такім чынам, за час вайны ва Украіне турэмнае насельніцтва скарацілася на 183 тыс. чалавек. Кіраўнік ФСІН адзначыў, што на гэта «пэўны ўплыў аказвае праца па падборы кантрактнікаў у Узброеныя сілы».
Яшчэ ў сакавіку бягучага года намеснік старшыні Вярхоўнага суда казаў, што ў расійскіх СІЗА і калоніях утрымліваюцца 308 тыс. чалавек. Тады ён назваў гэта «рэкордным мінімумам», нагадаўшы, што ў 2001 годзе ў Расіі было 1 млн зняволеных. Судзячы з даных ФСІН, устойлівае зніжэнне спецкантынгенту назіраецца з 2010 года, калі ён налічваў 864 тыс. чалавек. Гостеў адзначыў, што на скарачэнне колькасці зняволеных уплывае не толькі адпраўка на вайну, але і пашырэнне практыкі прызначэння прымусовых работ і іншых відаў пакарання. Таксама, паводле яго слоў, на дадзены момант каля 16 тыс. зняволеных, або каля 6% усяго турэмнага насельніцтва, занятыя ў вытворчасці прадукцыі для расійскай арміі. У 2025 годзе такой прадукцыі было выпушчана на 5,5 млрд руб.
Зняволеных пачалі вербаваць на вайну супраць Украіны ў 2022 годзе за грошы і памілаванне ад прэзідэнта РФ Уладзіміра Пуціна пасля 6 месяцаў службы. З лютага 2022 да лютага 2023 года вербоўку ў калоніях для «мясных штурмаў» вяла ПВК «Вагнер». Заснавальнік групоўкі Яўген Прыгожын казаў, што ўсяго ён набраў 50 тыс. зняволеных, з якіх загінула каля 20%. Пасля гэтым занялося Мінабароны. Пры гэтым зняволеных пазбавілі выплат і памілавання. Цяпер ім даюць «умоўнае вызваленне» і накіроўваюць на фронт да заканчэння вайны. Са зняволеных фармуюць атрады «Шторм», якія, паводле даных брытанскай разведкі, таксама выкарыстоўваюцца як штрафбаты. Паводле самых сціплых ацэнак, колькасць загінулых ва Украіне расійскіх зняволеных перавышае 21 тыс. чалавек, што складае каля 6% ад усіх беззваротных страт.
З лістапада 2022 года ў Расіі дазволілі мабілізаваць грамадзян, якія маюць судзімасць за большасць цяжкіх злачынстваў, у тым ліку за забойствы, рабаўніцтвы, разбой і наркатрафік. У чэрвені 2023-га Дзярждума ўхваліла закон, які дазваляе заключаць кантракты з Мінабароны тым, хто адбывае пакаранне, судзімым і падследным. Пазней гэтую практыку пашырылі і распаўсюдзілі на падсудных.
Колькасць зняволеных у Расіі ўпала да мінімуму з пачатку стагоддзя пасля масавай адпраўкі зэкаў на вайну
У Расіі рэзка скарацілася колькасць зняволеных у турмах і СІЗА, дасягнуўшы мінімуму з пачатку 2000-х гадоў. «Калі на канец 2021 года было 465 тыс.