Прэзідэнт Фінляндыі: У Украіны ўсе козыры ў руках

• 15.05.2026, 19:51

Ход вайны змяняецца.

Прэзідэнт Фінляндыі Аляксандр Стуб заявіў, што Украіна змагла перахапіць ініцыятыву ў вайне з Расіяй, таму любыя перамовы з Масквой павінны весціся з пазіцыі сілы. Такое меркаванне ён выказаў у інтэрв’ю тэлеканалу 15min.

Паводле слоў фінскага лідара, першы год пасля поўнамаштабнага ўварвання стаў для Украіны барацьбой за выжыванне, наступныя чатыры гады былі часам стойкасці, а цяпер сітуацыя мяняецца на карысць Кіева.

«Цяпер усё зводзіцца да матэматыкі. Украіна лідзіруе. Са снежня яна штомесяц знішчае або раніць ад 30 да 35 тысяч расійскіх вайскоўцаў. Цяпер Кіеў запускае па тэрыторыі Расіі больш беспілотнікаў і ракет, чым Масква здольная адбіць. Упершыню за ўсю вайну ў красавіку Украіна вярнула больш тэрыторый, чым Расія змагла захапіць. Калі ўжыць старую прымаўку, усе козыры цяпер у руках Украіны. Гэта дае ёй сур'ёзныя рычагі ўплыву. Таму перамовы павінны весціся з пазіцыі сілы», — падкрэсліў Стуб.

Ён таксама адзначыў, што Расія церпіць паразу не толькі на полі бою, але і ў стратэгічным вымярэнні.

У якасці прыкладу прэзідэнт Фінляндыі нагадаў, што Савецкі Саюз падчас Другой сусветнай вайны за чатыры гады прасунуўся прыкладна на 1600 кіламетраў, тады як расійская армія за чатыры гады вайны супраць Украіны змагла прасунуцца толькі на 60 кіламетраў.

Акрамя таго, паводле слоў Стуба, Крэмль сутыкнуўся з сур'ёзнымі геапалітычнымі наступствамі: Украіна канчаткова замацавалася як еўрапейская дзяржава, а НАТА пашырылася за кошт уступлення Фінляндыі і Швецыі, што стала стратэгічнай паразай Масквы.