NYT: ЗША могуць выкрасьці Рауля Кастра

• 16.05.2026, 20:24

Па прыкладзе Мадура.

ЗША могуць паспрабаваць захапіць 94-гадовага Рауля Кастра паводле «венесуэльскага сцэнару». Пра гэта паведамляе The New York Times са спасылкай на крыніцы, якія знаёмыя з абмеркаваннямі ў адміністрацыі прэзідэнта ЗША Дональда Трампа.

На гэтым тыдні Вашынгтон рэзка ўзмацніў ціск на Кубу, адзначае газета. ЗША актывізавалі разведвальныя палёты вакол вострава, а чыноўнікі ў прыватных размовах казалі пра магчымае нарошчванне амерыканскіх сіл у рэгіёне.

Акрамя таго, дырэктар ЦРУ Джон Рэткліф наведаў Кубу і запатрабаваў закрыць расійскія і кітайскія разведвальныя станцыі на востраве.

Выданне адзначае, што Вашынгтон імкнецца дамагчыся саступак ад Гаваны, не даводзячы краіну да поўнага хаосу. Адна з мэтаў адміністрацыі прэзідэнта ЗША Дональда Трампа — прадэманстраваць, што амерыканцам удалося пакласці канец «камуністычнаму кантролю над Кубай».

Як піша NYT, пракуроры абмяркоўваюць магчымыя абвінавачанні супраць Кастра, звязаныя з гандлем наркотыкамі, а таксама са знішчэннем у 1996 годзе самалётаў гуманітарнай арганізацыі.