FT звязала падзенне нараджальнасці ў свеце з распаўсюджаннем смартфонаў

• 17.05.2026, 17:32

Тэндэнцыя зафіксавана ва ўсім свеце.

Скарачэнне нараджальнасці ў розных краінах свету, акрамя іншых фактараў, звязана з распаўсюджаннем мабільнага інтэрнэту і смартфонаў, асабліва сярод моладзі, паведаміла Financial Times са спасылкай на экспертаў і статыстычныя даныя.

Так, даследчыкі Натан Хадсон і Эрнан Москосо-Боэда з Універсітэта Цынсінаты звязалі падзенне нараджальнасці з разгортваннем сетак 4G. Напрыклад, у ЗША і Вялікабрытаніі колькасць нараджэнняў найхутчэй скарацілася ў тых раёнах, дзе высокахуткасная сувязь з’явілася раней. Паводле іх версіі, развіццё лічбавых тэхналогій рэзка скараціла час, які людзі праводзяць у асабістых зносінах.

FT зафіксавала тую ж тэндэнцыю ва ўсім свеце. У ЗША, Вялікабрытаніі і Аўстраліі нараджальнасць сярод моладзі рэзка знізілася з 2007 года, у Францыі і Польшчы — з 2009-га, у Мексіцы, Марока і Інданезіі — з 2012-га. У Гане, Нігерыі і Сенегале рэзкае зніжэнне зафіксавана ў 2013–2015 гадах.

Рэзкае падзенне нараджальнасці таксама супала з распаўсюджаннем смартфонаў на мясцовых рынках. Як піша FT, пасля распаўсюджання смартфонаў нараджальнасць рэзка ўпала ў самых розных краінах, незалежна ад папярэдніх тэндэнцый. Пры гэтым, чым маладзейшая ўзроставая група, тым мацнейшы спад.

Прафесарка эканомікі Універсітэта Нотр-Дам Меліса Керні заявіла: «Верагодна, што сучаснае лічбавае медыя-асяроддзе аказала глыбокі ўплыў на грамадства, што прывяло да скарачэння колькасці рамантычных адносін».