Колькі каштуе мяса для шашлыку ў мінскіх крамах

• 17.05.2026, 21:04

Агляд.

Пачынаецца сезон барбекю, і з гэтай нагоды выданне «Toчка» паглядзела, колькі каштуе марынаванае мяса для шашлыку ў мінскіх крамах.

Найбольшы выбар аказаўся ў «Кароне». З больш бюджэтных варыянтаў — марынаваныя курыныя крыльцы па 9,9−10,9 рубля за кілаграм. Галёнкі і сцягна каштуюць 13,9−16,9, філе — 19,9−21 рубель. Свініна прасцейшая прадаецца за 16,8, шыя або карэйка — за 25−32 рубля. Кебабы і стэйкі каштуюць прыкладна 22 рублі за кілаграм.

Тут ёсць і шашлык у пластыкавых вёдрах. Курыны — 17,63 за кіло, свіны — 25,03. Каўбаскі для грылю — 14−18,9 за 1 кг.

У «Гіппо» выбар таксама прыстойны, хоць і меншы, чым у «Кароне». Курыныя крыльцы тут даражэй — 12,53−14,99 за кіло. Ёсць такі цікавы варыянт, як плячкі: каштуюць 16,49 за 1 кг. Сцягна танней — 15,99.

У замарозцы прадаецца шашлык са свініны ў пластыкавых вёдрах па 20,39 за кілаграм.

У «Еўраопце» ёсць нядорагія варыянты. Напрыклад, шашлык з мяса птушкі каштуе 11,99 за кіло. Сцягна тут абыдуцца ў 12,99−15,49, філе — у 19,99. Цэны на свініну стартуюць ад 11,99 за 1 кг, у сярэднім 12,9−17, самы дарагі варыянт — прыкладна 25 рублёў.

Свініна ў вядры абыдзецца ў 19,99 за кіло. Ёсць тара прыблізна на 1,8 кг і ўпакоўка ўдвая меншая.

Мяса ў вакуумнай упакоўцы прадстаўлена самае рознае, цэны — ад 12,99 да 30 рублёў.

У «Суседзях» выбар сціплейшы. Курыныя галёнкі каштуюць 12,99, мяса плавае ў марынадзе. Сцягна крыху даражэй — 13,16. А вось крыльцы адны з самых танных — 10,17. Выгадна браць і філе па 15,16. Што да свініны, яе прапануюць у сярэднім па 16−20 рублёў за 1 кг. Каўбаскі для грылю каштуюць 12−16 рублёў. У аддзеле, дзе ляжыць вакуумаванае мяса, цэны — 12−35 руб. за кіло. З цікаўнага — мядовы стэйк індычкі па 35,24 рубля.

На Камароўцы практычна ніхто не прадае шашлык на вагу. Але тут ёсць варыянты ў упакоўцы. Шашлык са свініны каштуе 14,38 руб. за 1 кг, менавіта з шыі — 17,8 руб. Кілаграм мяса ў вядры можна ўзяць за 16,67. Курыныя сцягна таксама выгадна купляць на рынку, цана ад 10,51 да 11,99 руб. за 1 кг. Каўбаскі для грылю прапануюць па 13−16 руб. за 1 кг.

На Камароўку аматарам шашлыку варта ісці па свежае мяса. Яно тут, бадай, прадстаўлена лепш за ўсё ў Мінску, робіць выснову выданне.