Напад з Беларусі: што задумалі Пуцін і Лукашэнка?

• Дзяніс Паповіч
• 21.05.2026, 12:56

Для беларускага дыктатара гэта азначае поўны разгром у вельмі кароткі час.

Выкажу парадаксальнае, на першы погляд, меркаванне адносна спробаў Расіі ўцягнуць Беларусь у вайну супраць Украіны. Гэтыя спробы працягваюцца ўжо пяты год. І пяты год Лукашэнка супраціўляецца.

Не таму, што ён раптам стаў праўкраінскім або адчувае шчырае раскаянне за тое, што даў расіянам тэрыторыю для ўварвання ва Украіну ў 2022 годзе. А таму, што выдатна разумее магчымыя ваенныя наступствы.

Беларусь мае састарэлую армію, зусім не гатовую да сучаснай вайны дронаў. Частку свайго ўзбраення і боепрыпасаў Беларусь аддала Расіі, каб тая вяла вайну супраць Украіны. Для Беларусі напад на Украіну — гэта поўны разгром у вельмі кароткі час.

Але мы бачым пэўную лагістычную падрыхтоўку, агрэсіўныя заявы Лукашэнкі, абвешчаную ім «кропкавую мабілізацыю». Гэта азначае, што яго «ўгаварылі»?

Па-першае, а што думае пра такое таварыш Сі? І гэта куды больш важнае пытанне для Лукашэнкі, чым ціск з боку Пуціна.

Па-другое, каб пачаць вайну супраць Украіны, Беларусі патрэбна не «кропкавая», а поўная мабілізацыя. Агульная колькасць Узброеных сіл Беларусі складае каля 65 тыс. чалавек. Іх трэба разгортваць і павялічваць у некалькі разоў.

Таму ўсе заявы Лукашэнкі і падрыхтоўка да вайны, на мой погляд, пакуль маюць паліятыўны і ў значна большай ступені інфармацыйны характар. Ён робіць усё гэта не таму, што вельмі хоча ваяваць, а якраз таму, што ВЕЛЬМІ НЕ ХОЧА. Ён выдатна разумее ўсе магчымыя наступствы для сваёй арміі. Але трэба дэманстраваць бачнасць, і ён гэта робіць.

У большай ступені я б казаў пра пагрозу для Еўропы. Вось супраць Літвы або Латвіі беларуская армія якраз магла б і спатрэбіцца.

Але ў гэтай вайне шмат што з боку нашых ворагаў адбываецца насуперак звычайнай логіцы. Таму, вядома, не варта нам забываць пра ролю Лукашэнкі ва ўварванні ва Украіну і пра тое, «адкуль на Беларусь рыхтаваўся напад». Нічога нельга выключаць.

Дзяніс Паповіч, «Фэйсбук»