Z-прапагандыст заклікаў расіян запасіцца лапухамі

• 21.05.2026, 17:33

Бяспечных месцаў у Расіі больш не існуе.

У асяроддзі пуцінскіх прапагандыстаў нарастае паніка з-за тэхналагічнай беспаможнасці РФ і пераносу вайны ў глыбокі тыл. Адзін з галоўных рупараў Крамля Аляксандр Коц адкрыта прызнаў, што бяспечных месцаў у Расіі больш не існуе, а сама краіна цалкам залежыць ад Кітая.

Па словах Z-ваенкара, пагроза ўдараў беспілотнікаў стала настолькі глабальнай, што нават на Камчатцы базы атамных падводных лодак (АПЛ) вымушаныя абцягваць антыдронавымі сеткамі, паколькі сучасныя FPV-дроны здольныя лятаць на вялікія адлегласці.

Асобна Коц раскрытыкаваў міфы пра расійскае «імпартазамяшчэнне», прызнаўшы, што без паралельнага імпарту і падтрымкі Пекіна краіна хутка вернецца ў каменны век.

«Мы застанемся ў рэальнай ізаляцыі без паралельнага імпарту, без дапамогі Кітая, без закупу нашых энергарэсурсаў. І, прабачце, у прыбіральню мы будзем хадзіць з лапухамі, бо газет не будзе, бо не будзе паперы, якую мы самі не зможам вырабляць. Таму няма тылу».