«Дзе гарантыі, што расіянка, якая купіла палац Радзівілаў, самавары там не расставіць і лапці не развесіць?»

• 22.05.2026, 8:42

Гістарычны помнік архітэктуры прадалі ўсяго за 90 беларускіх рублёў.

Гістарычны помнік архітэктуры Беларусі, палац Радзівілаў, прадалі ўсяго за 90 беларускіх рублёў.

Як паведамляюць дзяржаўныя СМІ, набыць палац было дзіцячай марай расіянкі Таццяны: «Усе дзяўчынкі мараць быць прынцэсамі са сваімі палацамі».

У палацы Радзівілаў грамадзянка Расіі плануе адкрыць кавярню, апарт-гатэль і дэманстрацыйныя залы. Таксама яна збіраецца закласці сад на тэрыторыі, якая прылягае да палаца, і пабудаваць альтанкі, дзе ў будучыні можна будзе праводзіць выязныя вясельныя цырымоніі.

Новая ўладальніца таксама хоча пераехаць у палац і абсталяваць сабе некалькі пакояў.

Вядомы беларускі гісторык пракаментаваў «Салідарнасці» гэтую навіну так: «Вось і дажылі. Расейцы скупаюць памяткі нашай гісторыі. Пакуль не знакавыя. Але што далей: Нясвіжскі замак?»

«Цікавы факт, што адзін з уладальнікаў палаца, Адам Солтан, страціў яго ў 1831 годзе за ўдзел у паўстанні — у яго канфіскавалі ўсю маёмасць, палац перайшоў у казну Расійскай імперыі. І вось, праз столькі гадоў, ён зноў у руках рускіх», — падзялілася меркаваннем чытачка «Салідарнасці».

«Гэта, вядома, цудоўна, што дзяўчына з Масквы вырашыла ажыццявіць сваю дзіцячую мару, але гэта беларуская гісторыка-культурная каштоўнасць. Як такое магчыма — прадаваць яе замежнікам?

І дзе гарантыі, што яна там самавары не расставіць і лапці не развесіць на маскоўскі лад? Магчыма, яшчэ партрэты Кацярыны з Пятром размесціць. Хтосьці будзе за гэтым сачыць і рэгуляваць?» — задаецца пытаннем яшчэ адзін чытач «Салідарнасці».