The Atlantic: Трамп наносіць удар па галоўнай крыніцы валютных паступленняў Кубы

• 25.05.2026, 16:34

ЗША ўзмацняюць ціск на Гавану праз экспарт нікелю і кобальту.

Адміністрацыя прэзідэнта ЗША Дональда Трампа узмацняе ціск на Кубу, нацэліўшыся на адну з нямногіх галін, што яшчэ прыносяць краіне валюту, — здабычу нікелю і кобальту. Гэтыя металы лічацца стратэгічнымі з-за попыту з боку вытворцаў акумулятараў, электронікі і абароннай прамысловасці, піша The Atlantic (пераклад — сайт Charter97.org).

Ключавым ударам сталі новыя санкцыі ЗША, уведзеныя 1 мая супраць кампаній, што супрацоўнічаюць з кубінскімі дзяржаўнымі структурамі. Пасля гэтага канадская Sherritt International абвясціла пра спыненне сумеснага праекта з кубінскай дзяржаўнай кампаніяй General Nickel Company. Менавіта Sherritt дзесяцігоддзямі падтрымлівала працу найбуйнейшага нікелевага комплексу ў Моа пасля распаду СССР.

Для эканомікі Кубы гэта сур'ёзны ўдар. Нікель і кобальт застаюцца трэцяй па велічыні пазіцыяй экспарту краіны, а галоўным пакупніком з'яўляецца Кітай. На фоне дэфіцыту паліва, адключэнняў электраэнергіі і недахопу тавараў улады Кубы называюць санкцыі «калектыўным пакараннем».

Аднак пазней Sherritt паведаміла, што толькі прыпыняе праект і абмяркоўвае продаж кантрольнага пакета акцый амерыканскай інвестыцыйнай кампаніі Gillon Capital. СМІ звязваюць яе з асяроддзем Трампа.

Вашынгтон разглядае Кубу не толькі як палітычнага праціўніка, але і як частку барацьбы з уплывам Кітая і Расіі ў рэгіёне. У Белым доме лічаць, што кантроль над пастаўкамі крытычна важных мінералаў становіцца пытаннем нацыянальнай бяспекі.

Эксперты папярэджваюць, што празмерны ціск можа прывесці да адваротнага эфекту — Гавана яшчэ больш цесна зблізіцца з Пекінам і Масквой.