Пакістанцы і непальцы адмовіліся працаваць на БЧ

• 31.05.2026, 20:20

Зарплатныя чаканні не супалі.

Мінскае аддзяленне БЧ звярнулася да пасярэдніцкай кампаніі з запытам на падбор працоўных мігрантаў з Непала і Пакістана, што вынікае з дакументаў, апублікаваных «Супольнасцю чыгуначнікаў Беларусі». Мова пра вакансіі манцёраў шляху, станцыйных рабочых і мыйшчыкаў-прыбіральшчыкаў рухомага складу, пры гэтым патрабаванне ведання рускай мовы ў пераліку ўмоў адсутнічае.

Як адзначаецца, яшчэ восенню мінулага года ў БЧ лічылі прыцягненне працоўных мігрантаў немэтазгодным, указваючы ва ўнутраных дакументах на магчымыя рызыкі для калектываў, дадатковыя выдаткі і сумнеўны эканамічны эфект. Аднак менш чым за год падыход да пытання, паводле звестак крыніц, істотна змяніўся.

Згодна з апублікаванымі матэрыяламі, Мінскае аддзяленне чыгункі накіравала запыт у ТАА «Станопрынт Інтэрнэшнл», зарэгістраванае ў сакавіку 2026 года, з просьбай падабраць замежных работнікаў на пасады, што не патрабуюць высокай кваліфікацыі. У спісе — 20 манцёраў шляху, 8 станцыйных рабочых і 8 прыбіральшчыкаў рухомага складу. Валоданне рускай мовай пазначана як неабавязковая ўмова.

Пры гэтым перамовы ўскладніліся на этапе абмеркавання аплаты працы. БЧ прапанавала зарплату на ўзроўні 950–980 рублёў, аднак пасярэднік заявіў, што за такія сумы працаўнікоў з Паўднёвай Азіі знайсці немагчыма. У адказ выстаўлена патрабаванне не менш як 1500 рублёў «на рукі», а таксама гарантыі звышурочнай занятасці.

У прадстаўленай камерцыйнай прапанове гаворыцца, што агульныя выдаткі на аднаго работніка могуць складаць каля 2900–3200 рублёў з улікам выдаткаў на пералёт, пражыванне, медыцынскую страхоўку, афармленне дакументаў і іншыя спадарожныя расходаў.

Асобна ў дакуменце апісваюцца «перавагі» прыцягнення работнікаў з Непала і Пакістана — у тым ліку высокая працоўная дысцыпліна, нізкая канфліктнасць і залежнасць ад наймальніка, што па сутнасці робіць іх больш кіраваным персаналам.

У «Супольнасці чыгуначнікаў Беларусі» заяўляюць, што сітуацыя адлюстроўвае кадравыя праблемы галіны і звязваюць іх з адтокам спецыялістаў і наступствамі падзей апошніх гадоў, уключаючы звальненні і ціск на супрацоўнікаў, якія пачаліся пасля 2020 года.