У Беларусі затрымалі фуру з таварамі з Кітая

• 4.05.2026, 13:46

У чым прычына?

Казахстанскі перавозчык паспрабаваў зэканоміць амаль 600 тысяч рублёў на мытных плацяжах, спрабуючы ўвезці ў Беларусь вялікую партыю тавараў з Кітая.

Падчас дагляду фуры беларускія мытнікі выявілі 90 тысяч тавараў, якія не былі ўказаныя ў суправаджальных дакументах. Сярод іх былі наборы касметыкі, каробкі для захоўвання, ліхтары, гадзіннікі, свяцільні, сумкі, эндаскопы і іншая прадукцыя.

«Кошт незадэклараваных тавараў склаў больш за 1,8 млн рублёў. А гэта амаль 583 тысячы рублёў эканоміі на мытных плацяжах», — паведамілі ў Дзяржаўным мытным камітэце.

У дачыненні да перавозчыка склалі пратакол. Правапарушальніку пагражае штраф у памеры да 30% ад кошту незаконна ўвезеных тавараў. Яму таксама давядзецца пералічыць у казну нясплачаныя плацяжы.