Зяленскі: Украіна гатовая да адкрыцця ўсіх шасці перагаворчых кластараў з ЕС

• 4.05.2026, 16:51

На якія тэрміны разлічвае Кіеў?

Украінскі прэзідэнт Уладзімір Зяленскі абмеркаваў еўраінтэграцыю Украіны з прэзідэнтам Еўрапейскага савета Антоніу Коштай.

«Асобная ўвага — працы над адкрыццём перагаворчых кластараў па ўступленні Украіны ў Еўрапейскі саюз. Наша краіна тэхнічна цалкам гатовая і чакае адкрыцця ўсіх шасці кластараў цягам гэтага і наступнага месяцаў», — падкрэсліў кіраўнік украінскай дзяржавы ў Telegram.

Зяленскі таксама падзякаваў Кошту за падтрымку і асабістыя намаганні ў разблакаванні крэдыту ў памеры 90 мільярдаў еўра.

«Важна, каб сродкі пачалі паступаць як мага хутчэй і дапамаглі Украіне падрыхтавацца да зімы», — адзначыў украінскі прэзідэнт.

Акрамя таго, Зяленскі і Кошта абмеркавалі ўзмацненне антырасійскіх санкцый. Прэзідэнт падзякаваў за 20-ы пакет санкцый ЕС і падкрэсліў, што Украіна разлічвае на ўзмацненне санкцыйнага ціску супраць расійскага «ценявога флоту» ў наступным пакеце.