Зяленскі пасля ўдару па НПЗ у Пермі жорстка звярнуўся да Крамля

• 7.05.2026, 15:12

Трэба ўстанаўліваць мір, а не бегаць па сталіцах свету з мальбамі пра паўзу на 9 мая.

Прэзідэнт Украіны Уладзімір Зяленскі пацвердзіў «дальнабойныя санкцыі» ў Пермі і звярнуўся да Крамля з заклікам наконт вайны.

Пра гэта паведамляе Charter97.org са спасылкай на заяву Зяленскага ў Telegram.

«Сёння ўкраінскія дальнабойныя санкцыі зноў у Пермі: гэта больш за 1500 кіламетраў ад нашай мяжы. Нядаўна былі і важныя вынікі ў Чалябінску — да 1800 кіламетраў, — а таксама ў Екацярынбургу — амаль 2 тысячы кіламетраў», — падкрэсліў ён.

Кіраўнік дзяржавы адзначыў, што «наступствы ўкраінскай дальнабойнасці» адчувалі ў Наварасійску, Крымску, Туапсэ, Самарскай і Ніжагародскай абласцях.

Зяленскі падкрэсліў, што Крэмль штодня можа спыніць вайну — не на некалькі гадзін, «каб атрымаць наш дазвол на правядзенне параду ў Маскве», а каб берагчы людскія жыцці.

«Трэба цаніць людзей, а не парады. Трэба ўстанаўліваць мір, а не бегаць па сталіцах свету з мальбамі пра паўзу на 9 мая. Мір патрэбны. Дзякуй усім, хто дапамагае Расіі гэта ўсвядоміць», — заявіў прэзідэнт Украіны.

Ён адзначыў, што Украіна неаднаразова прапаноўвала РФ рабіць крокі насустрач міру, але ў адказ атрымала новыя ўдары.

«Менавіта таму ўкраінскія дальнабойныя санкцыі рухаюцца насустрач аддаленым расійскім аб’ектам, якія маюць дачыненне да ваеннай прамысловасці Расіі, інфраструктуры вайны і фінансавання агрэсіі», — падкрэсліў Зяленскі.