У Крамлі — новая хваля панікі перад парадам 9 мая

• 8.05.2026, 10:21

Раптоўна адменены запрашэнні для замежных журналістаў.

Адміністрацыя прэзідэнта РФ адмяніла запрашэнні на парад у Маскве 9 мая для журналістаў замежных СМІ. Акрэдытацыю адклікалі ў супрацоўнікаў Der Spiegel, тэлеканалаў ARD, ZDF, Sky, Rai і NHK, а таксама інфармацыйнага агенцтва AFP. «У сувязі з сітуацыяй, якая склалася, фармат асвятлення парада быў зменены, таму замежныя СМІ, якім ужо была прадастаўлена акрэдытацыя, больш не будуць дапушчаныя», — паведамілі ў Крамлі прадстаўніку Der Spiegel.

Іншым замежным СМІ паведамілі, што на парад дапушчаны толькі расійскія СМІ. Як адзначае Spiegel, гэта першы выпадак, калі замежныя журналісты спачатку атрымалі акрэдытацыю на парад 9 мая, а пасля яна была адкліканая. Да гэтага Мінабароны РФ паведаміла, што на Парадзе Перамогі ўпершыню з 2007 года не будзе прадстаўленая калона ваеннай тэхнікі. Прэс-сакратар прэзідэнта РФ Дзмітрый Пяскоў патлумачыў, што мерапрыемства адбудзецца ў «скарочаным фармаце» з-за «аператыўнай абстаноўкі» і «тэрарыстычнай пагрозы» з боку Кіева. Пры гэтым Уладзімір Пуцін у размове з прэзідэнтам ЗША Дональдам Трампам прапанаваў абвясціць перамір’е з Украінай на 9 мая. Пазней расійскае ваеннае ведамства ў аднабаковым парадку заявіла, што рэжым спынення агню будзе дзейнічаць з 8 па 10 мая.

Прэзідэнт Украіны Уладзімір Зяленскі раскрытыкаваў спробы Крамля дамагчыся часовага перапынку ў баявых дзеяннях толькі на час правядзення Парада Перамогі ў Маскве. Ён адзначыў, што Пуцін «бегае па сталіцах свету» і ўпрошвае пра паўзу на 9 мая, тады як замест гэтага варта было б усталяваць сапраўдны мір. «Трэба цаніць людзей, а не парады», — падкрэсліў украінскі лідар. Зяленскі таксама нагадаў, што Кіеў неаднаразова прапаноўваў Маскве рухацца насустрач міру, але ў адказ атрымліваў толькі новыя ўдары.

У той жа час прэзідэнт Украіны рэкамендаваў прадстаўнікам замежных дзяржаў адмовіцца ад удзелу ў святочных мерапрыемствах у Маскве з нагоды 9 мая. Паводле даных Крамля, на Парадзе Перамогі ў расійскай сталіцы будуць прысутнічаць кіраўнікі Беларусі, Малайзіі, Лаоса і часткова прызнаных Абхазіі і Паўднёвай Асеціі. Таксама ў Маскву прыедуць прэм’ер Славакіі і прэзідэнт Рэспублікі Сербскай. Такім чынам, колькасць лідараў краін былога СССР на парадзе стане мінімальнай з 2022 года, калі да Пуціна не прыехаў ніводзін замежны кіраўнік дзяржавы, і ён сустракаў маршыруючыя калоны ў адзіноце.