Масква акапваецца

• 8.05.2026, 10:43

Вакол сталіцы РФ будуюць трэцяе кальцо СПА прама сярод дамоў.

OSINT-даследчык Jembob і журналіст «Радыё Свабода» Марк Крутаў пачалі новае даследаванне, прысвечанае новым расійскім вежам і рампам для размяшчэння сістэм СПА вакол Масквы.

Гэта будзе ўжо трэцяе кальцо СПА вакол расійскай сталіцы. І ўзводзіць яго пачалі з вясны мінулага года. Пачатак будаўніцтва многіх іншых датуецца восенню 2025-га або пачаткам 2026-га.

Марк Крутаў лічыць, што гаворка ідзе пра стварэнне трэцяга кальца СПА Масквы, якое будзе размешчана прыкладна так, як паказана на малюнку.

Найчасцей вежы СПА размешчаныя побач з населенымі пунктамі. На рэдкіх фота відаць, што часам нават прама ў вёсках.

Але часцей за ўсё вежы СПА будуюць у лесе; так, напрыклад, адна з іх знаходзіцца ва Уладзімірскай вобласці, у дзяржаўным прыродным заказніку Крутоўскі.

СПА Масквы складаецца з трох элементаў:

Зенітныя ракетныя комплексы (ЗРК): аснову складаюць сістэмы вялікай і сярэдняй далёкасці С-400 «Трыумф» і С-300.

Аб'ектная СПА: для перахопу маламерных мэт (дронаў) выкарыстоўваюцца комплексы «Панцыр-С1», якія часта размяшчаюць на дахах адміністрацыйных будынкаў і ў межах горада.

Радыёэлектронная барацьба (РЭБ): выкарыстоўваюцца сістэмы для падаўлення сігналаў GPS і кіравання БПЛА, што часам прыводзіць да збояў у працы навігатараў у грамадзянскіх асоб.

Нагадаем: нягледзячы на шчыльнасць абароны, асобным дронам удавалася прарывацца да цэнтра горада або падаць у жылых раёнах, калі іх падаўляла РЭБ.

Так, нядаўна мы распавядалі пра тое, што дрон уляцеў у знакаміты «Дом на Масфільмаўскай».