У Беларусі пабіты тэмпературныя рэкорды амаль 60-гадовай даўніны

• 8.05.2026, 14:50

Максімумы перакрытыя ў Мінску, Віцебску і Магілёве.

Пяты дзень на метэастанцыях Беларусі фіксуюцца тэмпературныя рэкорды, пра што сведчыць праведзены «Позіркам» параўнальны аналіз аператыўных і даступных архіўных дадзеных Белгідрамета.

7 мая ў Мінску і двух абласных цэнтрах перакрытыя максімумы, што трымаліся з 1968 года.

Рэкорды ў буйных гарадах:

Мінск: паветра прагрэлася да 26,2 градуса (папярэдні экстрэмум — 25,7);

Віцебск: да 26,5 (раней было 26,2);

Магілёў: да 28,4 (раней было 27,8).

Таксама былі абноўленыя 58-гадовыя рэкорды ў Васілевічах (29,1 супраць 27,6), Жлобіне (29,1 супраць 27,9) і Горках (26,2 супраць 25,4).

Найгарачэй мінулым днём было ў Гомелі — 29,2 градуса. Папярэдні лакальны экстрэмум тут быў зарэгістраваны ў 2010 годзе (26,9).

Абсалютны рэкорд дня для ўсёй тэрыторыі краіны ўстояў — ён па-ранейшаму складае 30,6 градуса (зафіксаваны ў 1969 годзе ў Жыткавічах).