Opel выпусціць недарагі кампактны электракросовер

• 8.05.2026, 18:05

Мадэль атрымае пярэдні прывад і запас ходу да 434 кіламетраў.

У мадэльным шэрагу Opel з’явіцца яшчэ адзін электрамабіль. Кампактны кросовер C-класа абяцаюць зрабіць даступным.

Недарагі электрычны кросовер Opel паступіць у продаж з 2028 года. Першыя падрабязнасці новай мадэлі раскрылі на сайце канцэрна Stellantis.

Кросовер зойме нішу паміж электрычнымі версіямі Opel Frontera і Grandland — гэта будзе даступная пярэднепрывадная мадэль C-класа. На дадзены момант на рэндэры паказалі сілуэт аўтамабіля з гранёным дызайнам і пярэдняй часткай у фірмовай стылістыцы Opel Vizor.

Каб знізіць сабекошт, электрамабіль Opel распрацуюць сумесна з Leapmotor. Як вядома, Stellantis з’яўляецца суўладальнікам гэтага кітайскага брэнда і займаецца прасоўваннем яго мадэляў на еўрапейскі рынак.

Вытворчасць электракара стартуе на прадпрыемстве ў іспанскай Сарагосе, дзе цяпер выпускаюць Opel Corsa. Менавіта там будуць збіраць і электракросовер Leapmotor B10 для еўрапейскага рынку.

Паводле звестак сайта Motor.es, менавіта новы Leapmotor B10 можа стаць асновай для будучага Opel. Гэты 4,5-метровы электракросовер у еўрапейскай спецыфікацыі абсталяваны рухавіком магутнасцю 218 к.с. і даступны з батарэямі ёмістасцю 56,2 і 67,1 кВт·г. Запас ходу складае ад 361 да 434 км.