У матчы чэмпіянату Беларусі забілі гол «сухім лістом»

• 8.05.2026, 20:46

Дзмітрый Анцілеўскі эфектна вызначыўся прамым ударам з кутняга.

У матчы чэмпіянату Беларусі паміж «Баранавічамі» і дзяржынскім «Арсеналам» гулец «Арсенала» Дзмітрый Анцілеўскі забіў прыгожы гол, падаўшы мяч з кутняга, паведамляе Betnews.by.

На 39‑й хвіліне матчу Анцілеўскі падаваў мяч у штрафную пляцоўку з кутняга, і той, не закрануўшы ніводнага з гульцоў, раптоўна заляцеў у далёкі кут варот.

Такі ўдар у футболе звычайна называюць «сухі ліст». Гэта легендарны футбольны прыём, пры якім мяч пасля ўдару ляціць па складанай дузе, круціцца вакол сваёй восі і напрыканцы рэзка апускаецца ў вароты. Сваю назву ён атрымаў за падабенства траекторыі з тым, як на зямлю падаюць сухія лісты: здаецца, што мяч ляціць міма або вышэй, але ў апошні момант яго «прыбівае» да зямлі.

Гэты ўдар лічыцца адным з самых складаных для брамнікаў, бо вызначыць пункт прызямлення мяча практычна немагчыма да самага апошняга моманту.

Калісьці яшчэ ў савецкія часы гэты прыём быў сапраўднай візітнай карткай гульца кіеўскага «Дынама» Валерыя Лабаноўскага, які пазней яшчэ больш праславіўся як сусветна вядомы трэнер. А яго сусветным родапачынальнікам лічаць бразільскага футбаліста Дзідзі, які іграў у 1950‑я — 1960‑я гады.