Ва Украіне рассакрэцілі дадзеныя пра распрацоўшчыкаў расійскай зброі

• 10.06.2026, 14:37

ГУР запусціла новы раздзел пад назвай «Інжынеры агрэсіі».

Галоўнае ўпраўленне разведкі Міністэрства абароны Украіны на партале War&Sanctions запусціла новы раздзел пад назвай «Інжынеры агрэсіі», дзе будзе публікавацца інфармацыя пра асоб, якія забяспечваюць вядзенне агрэсіўнай вайны супраць Украіны, займаючыся праектаваннем і распрацоўкай расійскага ўзбраення.

Па інфармацыі ГУР МА, расійскае навукова-інжынернае асяроддзе адыгрывае ключавую ролю ў падтрыманні ваеннага патэнцыялу РФ. Навукоўцы і канструктары ўдзельнічаюць у стварэнні ракетных комплексаў, беспілотных сістэм, сродкаў навядзення і тэхналогій штучнага інтэлекту, якія выкарыстоўваюцца для ўдараў па грамадзянскай інфраструктуры і мірным насельніцтве Украіны.

Некаторыя спецыялісты працягваюць заставацца інтэграванымі ў міжнародную навуковую супольнасць, атрымліваюць гранты, удзельнічаюць у сумесных даследаваннях і супрацоўнічаюць з замежнымі інстытутамі.

Набыты досвед яны выкарыстоўваюць на сваіх прадпрыемствах для распрацоўкі новых сродкаў масавага знішчэння і здзяйснення ваенных злачынстваў. У першую версію раздзела ўключаныя прадстаўнікі расійскага абаронна-прамысловага комплексу: канструктары і кіраўнікі прадпрыемстваў, сярод іх:

- Сяргей Сюрсін, галоўны канструктар Воткінскага завода, пад кіраўніцтвам якога ажыццяўляецца вытворчасць балістычных ракет «9М723» са складу АТРК «Іскандэр-М» і РС-26 «Рубеж», больш вядомых як «Арэшнік»;

- Елтуган Сіздыкаў, галоўны канструктар ГОСМКБ «Радуга» імя А. Я. Бярэзняка, асноўнага прадпрыемства па распрацоўцы і вытворчасці стратэгічных крылатых ракет «Х-101»;

- Віталій Іекель, галоўны канструктар вытворчага аб'яднання «Страла», які ажыццяўляе непасрэднае кіраўніцтва канструктарскімі распрацоўкамі і мадэрнізацыяй звышгукавых супрацькарабельных крылатых ракет 3М55М «Онікс-М».

У далейшым спіс будзе пашырацца, каб кожны, датычны да пакутаў украінскага народа, не мог жыць спакойна.