Бензін масава знікае ўжо і на поўдні Расіі

• 10.06.2026, 16:58

У Краснадары ўжо стала цяжка запраўіцца на звычайных АЗС.

Расіяне ў сацыяльных сетках б’юць трывогу і паведамляюць, што дэфіцыт бензіну распаўсюджваецца па поўдні Расіі, перакінуўшыся з Крыму на Краснадарскі край і Дагестан, піша «Дыялог».

Адзін з карыстальнікаў запісаў відэа, у якім расказаў, што кампанія, якая прадастаўляе паліўныя карты, папярэдзіла кліентаў пра праблемы з бензінам і дызельным палівам у рэгіёне.

Па яго словах, у Краснадары ўжо стала цяжка запраўіцца на звычайных АЗС, у тым ліку на запраўках «Лукойла». Пры гэтым рэзервуары, якія яшчэ падтрымлівалі пастаўкі, нібыта знаходзіліся ў Армавіры і Валгаградзе, аднак цяпер і яны практычна апусцелі.

«Усім добры дзень! Сёння нам патэлефанавала арганізацыя, якая прадастаўляе нам паліўныя карты, і сказала, што на поўдні Расіі вельмі вялікі дэфіцыт паліва: як бензіну, так і дызеля. Сказалі, што ў Краснадары ўжо на запраўках «Лукойл» цяжка запраўіцца звычайным фізічным асобам. Адзіныя рэзервуары, якія нас кармілі, былі ў горадзе Армавіры, і найбліжэйшы яшчэ быў горад Валгаград, але тыя рэзервуары ўжо пустыя. Скажам так, ужо ўсё апошняе адтуль дасталі, і нас папярэдзілі, што будзе вельмі вялікі дэфіцыт. Хутчэй за ўсё, паліва будуць выдаваць па ліміце, таму, калі што, майце на ўвазе: падобна, да нас сітуацыя з Крымам таксама дабіраецца, таму што ўсе астатнія рэзервуары ў нас ужо разбураныя», — заявіў ён.

Таксама паведамляецца, што буйныя сеткі — «Раснафта», «Газпрам» і «Лукойл» — ужо адмяняюць зніжкі і рыхтуюцца абслугоўваць у першую чаргу юрыдычных асоб з паліўнымі картамі. Паводле слоў аўтара відэа, выдача дызельнага паліва таксама можа быць абмежаваная лімітамі.